Manchester United chuan player thar lakluh leh hralh chhuah an ruahman bakah, an player neih sa pawimawh tak takte chu contract thar ziahpui tumin hma an la mek. Nakkum nipuia contract hmang zo tur Luke Shaw-a chu a thlawna chhuahtir (free transfer) INEOS lamin an duh loh avangin contract pawhsei chungchang sawipui an tum a. Chutih rualin, nipui laia chhuak tura ngaih Harry Amass-a leh defender Lisandro Martinez-a te contract-a kum khat dang pawhsei theihna option awm chu United hian an hman (trigger) ngei a rinawm bawk.
Mahse, United ṭantute ngaihven ber chu an captain Bruno Fernandes-a hmabak a ni. Fernandes-a contract hi kum 2027-ah a tawp dawn a, United hian kum khat dang pawhsei theihna option an kawl bawk. Tun dinhmunah chuan contract thar ziah chungchanga inbiakna hi a khaihlak rih a, hei hian Juventus-in an ngaihven phah mek a ni. Engpawh nise, English league-a vawi 20 champion tawh United hian an captain hi a thlawna chhuahtir an tum lo hle. Contract thar chungchangah inremna an siam thei lo a nih pawhin, kum khat dang pawhsei theihna option hi an hmang dawn a, mahse club neitu tharte chuan he Portugal international hi hun rei zawk atan contract thar ziahpui ngei an la tum fan a ni.
Inbiakna a khaihlak chhan ber chu kum 32 mi Fernandes-a hlawh phut zat vang a ni. Champions League nomawi vawi thum lo chawi tawh United hian Fernandes-a hi an club-a hlawh hnem ber ni turin contract chhawp an tum rilruk laiin, Marcus Rashford-a rawn kir lehna chuan buaina thar a rawn thlen ta tlat a ni. He Mancunian forward hian bonus te nen kar khatah £390,000 lai a hlawh mek a, INEOS hotute chuan nipui liam taa an lo tihhniam tawh club wage structure (hlawh pek dan phung) tihchhiat leh chu an duh lo a ni.
He thil chungchang hi transfer thuthang hre thei Fabrizio Romano-a'n 'Here We Go Podcast'-ah puangzar zuiin, "Atu mah inremna an la siam lo. Tun dinhmunah chuan Man Utd ṭantute tan hlauhthawn a la hun lo hle a, hun a la tam em em a ni. Tun hi October thla tir chauh a la nih avangin, he dinhmun chingfel tur hian thla eng emaw zat hun an la nei. Chutih rualin, Bruno-a contract hi kum 2027-ah a tawp dawn a, mahse United hian kum 2028 thlenga pawhsei theihna clause an kawl tih theihnghilh loh tur a ni. Chuvang chuan, dinhmun chu an la thunun thei hle a, mahse Manchester United hian Bruno Fernandes-a agent chu an la be reng tho a ni. Contract thar chungchangah inbiakna an nei mek a. He inbiaknaah hian thil tam tak sawiho tur a la awm a ni. Hlawh chungchang chauh a ni lo a, mahse hlawh pawh hi thupui pakhat chu a ni ve tho. Marcus Rashford-a hlawh tam tak nena Manchester United-a a rawn kir leh aṭang khan, club hlawh pek dan phung a inthlak leh ta a, chuvang chuan hlawh hi thupui pawimawh a tling a, mahse contract rei zawng tur leh release clause chungchangte pawh a tel bawk. Harry Kane-a chungchang nen chuan a inang lo thung a, heta mi hi chu release clause pangngai tak a ni a, tun contract-ah hian €65million (£55.1m) a tling a ni. Chuvang chuan he clause hi engtin nge an tih dawn tih an ngaihtuah a ngai a, mahse Bruno Fernandes-a chungchanga inbiakna hi chu a la kal reng a ni," tiin a sawi.
Hlawh phut zat bakah hian, club captain hian contract rei zawng tur chianna neih a duh a, United lam erawh chuan a contract-a release clause awm mek hi paih bo emaw, a aia tam daiha tihsan emaw an duh thung. Tun dinhmunah chuan Fernandes-a hi Old Trafford-ah a lungawi hle rih a, mahse season thara buaina an tawh leh a, Champions League khel phak lova an awm leh a nih chuan thutlukna dang a siam a ngai tawh maithei a ni.
