Manchester United winger hlui Jadon Sancho chuan club thar a hmu ṭep ta niin a lang a, Spanish club Getafe chuan he English forward hi lakluh tumin ngawrh takin hma an la mek a ni.
Kum 26 mi Sancho hi nipui laia Old Trafford-a a contract a zawh hnu khan tun thlengin club nei lovin a la awm a, free agent a ni mek a ni. Russia club Krasnodar chu Sancho hi lak theihna hun remchang pe mah se, Russian club hian he England international hlui hi lak an duh loh thu an lo hrilh tawh nia sawi a ni a. Hemi bakah hian Brazil rama club ṭhenkhat leh a club hlui Borussia Dortmund te pawh sawizawm an lo ni tawh bawk a ni.
Mahse tun dinhmunah chuan Getafe chu Sancho lakluh theih nan hian an nawr na berah an ṭang chho ta a. Transfer chanchin puangzar chiang ṭhin Fabrizio Romano chuan Getafe hian he winger hi a thlawna lakluh theih nan an hnenah official offer an thehlut tawh tih a tarlang a ni. Chutih rualin Spanish chanchinbu Mundo Deportivo chuan Sancho-a hlawh phut zat chu he transfer tihpuitlin kawnga harsatna lian ber tur a nih thu an tarlang thung.
Mahse Getafe hian kawng dang an nei hlauh a, an forward Juanmi chu hliam na tak a tawrh avangin La Liga dan hnuaia 'long-term injury exemption' hmangin a thlaktu an ziak lut thei dawn a, hei hian salary cap limit bawhchhe miah lovin Sancho hi ziah luh theihna hun remchang a pe dawn a ni.
Sancho hi Middle East lam club-te pawhin an ngaihven hle a, mahse La Liga club Getafe hian United player hlui tho Mason Greenwood an lo lakluh tawh dan ang chiah khan he inremna hi tihhlawhtlin nawn leh an duh hle a ni. Getafe hian kumin nipui chhung hian player hmingthang tak Dani Carvajal pawh free agent a nih laiin an lo lalut tawh bawk a, Real Madrid legend hian June thlaa Bernabeu-a a contract a zawh hnuah he Spanish club hi a zawm a ni.
Sancho hi Manchester City youth system aṭanga rawn inzirchhuak a ni a, kum 2017 khan naupang te niin Borussia Dortmund a zawm a. Germany rama a khelh ṭhat em avangin kum 2021 khan United chuan an lalut ta a ni. United tan hian inelna hrang hrangah match 83 inlanin goal 12 a khung a, midang pet luh tur vawi 6 a siamsak bawk.
Old Trafford-a a awm chhung hian buaina hrang hrang a tawk zui a, January 2024 khan Dortmund-ah loan-in a kir leh a, 2024-25 season khan Chelsea-ah loan-in a chhuak leh a, season liam ta khan Aston Villa-ah loan bawk hian a khel leh a nih kha. Dortmund lama a luh leh theihna chance chungchangah khan manager Nico Kovac chuan thla liam ta khan heti hian a lo sawi tawh a:
"Nipui transfer window kha kan hmang ṭha hle niin ka hria. Dinhmun ṭha takah kan ding a, squad pawh a lian tawk tawh hle a ni. Khelmual chhung player 26 lai kan nei a, an zinga tam tak chu player naupang an ni bawk. Chuvang chuan Sancho-a chungchangah hian rilru tihbuai a ngai lo a ni," tiin a lo sawi tawh a ni.
