France senior team tana a inlan hmasak berah Leny Yoro chuan chet ṭhatna ropui tak lantirin, Nations League-ah Les Bleus chu Belgium laka 4-1 a an chak theih nan a pui a. He rawlthar chet ṭhatna hian Manchester United head coach Michael Carrick chu centre-back thlan kawngah inngaihtuahna thar a neih tir ngei a rinawm.
Kum 20 mi defender hian leilam innuaina (ground duels) vawi 4 a hmachhawnah vawi 4 a hneh vek a, boruaka innuaina (aerial battles) vawi 5 a neihah pawh a khingpuite a hneh vek bawk a ni. He chet ṭhatna hian Old Trafford-a bul a ṭan nghal char char dawn tih nemnghet chiah lo mah se, tun season club tana hun a chan tlem em avangin first-team-a khelhna hun ṭha a hmuh tam theih nan chhan ṭha tak a rawn chhawpchhuak thung a ni.
Yoro hian France tana a senior match hmasa berah tlarhnung laili luahin, United striker hlui Romelu Lukaku telna Belgium tlarhma a hmachhawn a. Mimal inbeihnaah a dingchhuak ṭha hle a, France-in 4-1 a hnehna an chan chhung zawng khan a khel tluan thak a ni. He hun pawimawh tak hi a chhungte hmuhlai ngeia a hmachhawn avangin hriatreng tlak a nih thu Yoro chuan a sawi a, chutih rualin clean sheet an neih theih loh erawh pawi a tih thu a sawi lang tel bawk.
United tana thuchah chiang ber chu a khelh dan kimchangah hian a lang a: Yoro hian leiah leh boruakah innuaina pakhat mah a hloh lo va, vawikhat mah bum kân (dribbled past) a tawk lo bawk. Tlarhnung venhim kawngah thawhhlawk takin hna vawi 11 a thawk a; tackle vawi 4 a beih aṭangin vawi 3 a hlawhtling a, ball vawikhat la chatin, vawi 6 a tifai (cleared) a, ball vawi 4 a chhar let (recoveries) bawk a ni.
Ball khawih leh in-pass kawngah pawh a puitling hle a. Yoro hian pass vawi 80 a pek aṭangin vawi 74 a pe dik a, long ball vawi 10 a vawrh aṭangin vawi 7 a pe dik bawk a, key pass vawikhat siamin vawi 96 zet ball a khawih a ni. Hei hian France-in tlarhnung aṭanga game an buatsaih ṭanna (build-up)-ah a pawimawh zia a pholang chiang hle.
United-ah chuan Yoro-a tana chona lian ber chu a theihna ringawt nilova, team-a hmun nghet chan a ni. Tun hma khan Harry Maguire emaw Lisandro Martinez emaw te an hliam emaw an chawlh emaw chauhvin Carrick hian a hmang tlangpui ṭhin. Mahse hetiang theihna sang a pholan takah chuan, senior defender-te an dam ṭhat lai pawhin kum 20 mi hi rinngam a ni em tih ngaihtuahna Carrick-a'n a neih a ngai tawh dawn a ni.
Tun 2026-27 season chhungin United tan Premier League-ah vawi hnih chauh bench aṭangin a la inlan a, EFL Cup leh Champions League-ah vawi khat ve ve bul a ṭan bawk a; inelna zawng zawngah match 4 khelin minute 202 chauh khelmualah a la hmang a ni. He Nations League inkhela a chet ṭhat em avang hian Carrick-a'n tlarhnung thlan kawngah ngaihtuahna thar a hman a ngai ngei dawn a, Carrington training lama a chet chhunzawm zel dan chuan Old Trafford-a a dinhmun a hril chho zel dawn a ni.
