Nakkum nipui transfer bazar inhawn hunah Manchester United chuan khawvel tlarhnung ṭha ber pawl din tumin an sum leh theihna zawng zawng sen an tum hle dawn nia hriat a ni.
Kum 2025 chhung khan tlarhma thuamṭhatna lam an ngai pawimawh hmasa a, Benjamin Šeško, Matheus Cunha leh Bryan Mbeumo-a te an lo lalut tawh a. Nipui liam ta khan tlar laili (midfield) thuamṭhat lehna lam ngaihtuahin Youri Tielemans, Andrey Santos leh Carlos Baleba-a te an lo lalut leh bawk a ni. Lehkha phek chungah chuan Red Devils hian tlar laili leh tlarhma ṭha tak an nei tawh a, tlarhnung thuamṭhat hi an hmalakna lehzel tur a ni a, hei hian kum 2028-a Premier League title beisei thei tura an inbuatsaihna chu a taka chantir turin a pui dawn a ni.
Old Trafford pan tur hian Tyrick Mitchell, Adrien Truffert leh Alejandro Balde-a te chu sawizawm an la ni reng a. Hemi rual hian Tribal Football-a Dean Jones-a'n a report danin, Nottingham Forest centre-back Murillo pawh United-in an thlithlai hnai hle a ni. He Brazilian defender nena sawizawmna hi a dai deuh tawh emaw tih hnuah, Jones-a'n United-in an la ngaihven reng tih a sawi nawn leh a. Jones-a'n, "Liverpool leh Chelsea te pawhin Nottingham Forest defender hi an ngaihven ve reng laiin, nakkum lama an tlarhnung thuamṭhat dan tur an ngaihtuahnaah Manchester United radar-ah Murillo hi a la awm reng a ni," tiin a sawi.
He Samba star hian Ineos-in an project thar tana player an zawn ang chi zawng zawng a nei vek a ni. Premier League-a tawn hriat a neih tawh bakah, tharum hmanga tlarhnung a venhim ṭhat dan leh ball a thunun hneh dan te hian Old Trafford hotute rilru a la hle a ni. Chuvang chuan Jones-a'n, "United-in an thlithlai reng a, lakluh theihna hun remchang a awm a nih chuan lakluh ngei pawh an la tum ruh hle a ni," a ti bawk.
Thlasik transfer bazar chhung hian inremna siam chu thil harsa tak a nih dawn avangin, English champion vawi 20 lai ni tawh United-in nakkum nipui hi he player dawr nana hun ṭha berah an ngai a ni. Murillo-a transfer chanchin hian reh lam a pan thei meuh lo a, mahse Forest-in contract thar an ziah fel deuh chauh avang hian lakluh erawh a awlsam dawn lo thung. Engpawh nise, Ineos-in tlarhnung thuamṭhat an tumna kawngah hian Forest star Murillo-a hi ngaihven zui chi tak a ni a, United-in lakluh theihna hun remchang an hmu a nih chuan an bawhpelh hauh lo ang.
