Manchester United legend Rio Ferdinand chuan Portugal national team boss Jorge Jesus chu nasa takin a sawisel a, Cristiano Ronaldo nena an inkar siamṭha turin he coach hian ngaihdam a dil ngei a ngai a ni tiin a vaukhannawn hle.
Jorge Jesus-a hnuaiah hian Portugal chu UEFA Nations League-ah an che ṭha em em a, a zawnin match li (4) ngawt hnehna an chang tawh a ni. Wales, Norway (vawi hnih) leh Denmark te hnehin he inelna quarter-final hi an lut chiang tawh a ni. Mahse he hlawhtlinna ropui tak hi Jesus leh Ronaldo te inkar buaina chuan a hliahkhuh tlat thung.
Kum 72 mi coach Jesus-a'n player naupang zawk chhawr a thlan zawk thu a tihlan hnuah, Ronaldo chuan zah lo taka cheibawl niin a inhria a, Portugal camp chu a chhuahsan hmak a nih kha. Hemi hnu hian social media lamah thuchhuah siamin, an pahnih inkara thil thleng dik tak chu a hun takah Portugal mipui zawng zawngte hnenah a la puanzar tur thu a lo tarlang tawh bawk a ni.
Al-Nassr forward Ronaldo hi Jesus-a'n ram tana a rawn kir leh a la phal reng thu vawi engemaw zat a sawi tawh a. Mahse, thudawnna hrang hrang tarlan danin Jesus-a'n team a enkawl chhung chu kum 41 mi Ronaldo hi a kir tawh dawn lo niin a lang. Ronaldo hian Portuguese Football Federation hnenah Jesus hi ban turin a ngen niin an sawi a, chu mai bakah squad chhungah dinhmun pawimawh tak neih a phut bawk a ni.
Ballon d'Or vawi nga dawng tawh Ronaldo hi Wales an hmachhawn ṭumin minute 67 a inlan a, Norway lakah erawh bench aṭangin a inlan lo thung. Second half-ah warm-up nei tura an tih hnuah luhtir a nih leh tak si loh avang khan Ronaldo hi a lungawi lo zual hle a ni.
Jesus-a'n bul ṭha tak a ṭan chungin he thutlukna hi Ferdinand chuan a pawm pui lo hle a. Ferdinand chuan a podcast-ah sawiin: "Cristiano Ronaldo kha dinhmun chhe takah dah a ni a, awm lo lutuk tak maiin an cheibawl a ni. Football khawvelah sulhnu ropui tak a nei. Jorge Jesus hian Ronaldo chungchang hi a khawih fuh lo hle a, khatianga a cheibawl chhan kha ka hrethiam thei thlawt lo a ni," a ti.
Ferdinand chuan sawi zui zelin: "He manager hian Alex Ferguson emaw Pep Guardiola emaw niin a inngai a ni maithei. Engvanga manager ropui tak takte bula inhung ve ngawt nge a nih ka hre lo. Cristiano Ronaldo phu ang ngei zahna a lantir tur a ni," a ti bawk.
Premier League title vawi ruk la tawh Ferdinand chuan: "Coach hian a rawn pan a, ngaihdam a dil a ngai a ni... a nih loh chuan ban a ni ngei ang. Rawn inlarin: 'Ka thlir dan kha a lo dik lo a ni' tiin a sawi tur a ni. Ronaldo hian thawh tur a la nei ngei tih ka ring. A bul ṭantu nge a nih dawn, match ṭhenkhatah substitute pawimawh nge a nih dawn, a nih loh leh match ṭhenkhatah bul ṭanin a dangah bench aṭangin a lut dawn tih hi sawiho a ngai a ni. Hengte hi sawiho a, inremna neih tawhte zah sak mai chu an tih tur a ni. Heng coach-te hian team enkawl tura hlawh an lak rualin, mihring rilru enkawl tura hlawh la an ni bawk," tiin a sawi chhuak a ni.
