Manchester United legend Rio Ferdinand chuan Elland Road-a Leeds United nen 1-1 a an inhnehtawk hnuah, kum 20 mi French defender Leny Yoro-a chet ṭhat zia a fak a, manager Michael Carrick-a'n starting XI-ah a chhawr reng a ngai a ni tih a sawi.

He match-ah hian Bryan Mbeumo chuan first half-ah United tan goal hmasa ber a khung a, second half-ah Dominic Calvert-Lewin chuan Leeds tan an siphurh a rawn sut ve leh a ni.

A podcast 'Rio Ferdinand Presents' show-ah Ferdinand chuan right-back-a khel Leny Yoro-a chet ṭhat zia hi a sawichhuak a ni. Kar tir lamah Champions League-a Atletico Madrid laka 2-0 a an tlawm ṭum khan Yoro hi second half-ah red card hmuin hnawhchhuah a lo ni tawh a. Hemi hnu Pathianni chawhnu inkhelah Yoro hi right-back position-ah bul ṭantir a ni leh a, Ferdinand-a mit a lo la hle a ni.

Ferdinand chuan, "First half-ah khan Leny Yoro, a bikin back post a venhimna kawnga a khelh dan kha a sang takzet a ni. A inrintawkna pawh a ṭhang chho zel nia a lan avangin, tunah chuan team-ah hian a zawnin a khelh chhunzawm a ngai tawh a ni," tiin a sawi.

United manager Michael Carrick hian pre-season summer tour aṭang khan Yoro hi position hrang hrangah a lo chhawr chhin tawh a, French defender pawh hian tun hnai kar engemaw zat chhung khan a theihna sang a rawn phochhuak chho hle a ni. October international break chhung khan Zinedine Zidane-a enkawl France senior team tan a debut match a khel a, fak a hlawh em em bawk.

Ferdinand chuan Yoro hian United starting XI-ah hmun nghet a luah dawn tih chiang takin sawi thei lo mah se, he France international inrintawkna thar rawn nei chho mek hi chhawr ṭangkai zui zel a ngai tih a sawi. "Eng position ber hi nge amaha a siam nghet ang tih ka hre lo na a, 'He team-ah hian ka awm ve ngei a ngai a ni' tih a inrilru a ni. Hetiang anga a khelh chhunzawm zel a, match a khelh tam zel phei chuan, player dang hliam aṭangin rawn dam let tawh mah se ka pawi ti lo. Leny Yoro hi team-ah a cham a, a hlutna leh pawimawhna hi a lantir chhunzawm zel a ngai a ni. A chhan chu chawlhkar tin hian a rawn chak chho tawh tlat a ni," tiin a sawi.

Ferdinand chuan sawi belhin, "Madrid-a Atletico nena an inkhelh ṭum khan a chhehvel a nghet ka ti a. France tana Zidane-a hnuaia centre-back-a a khelh ṭum pawh khan a che ṭha takzet a ni. Chutiang aṭanga rawn kir lehin, inrintawkna thar nen a rawn inkhel leh ta niin ka hria," a ti bawk.

2026-27 season chhung hian Old Trafford club tan inelna hrang hrangah Yoro hian match sarih a khel tawh a. Premier League-ah vawi li inlan tawhin vawi hnih bul a ṭan tawh a ni.