Manchester United defender hlui Patrice Evra chuan a nu boral thu rilru na tak chunga puangzar chungin, social media lamah a sun thu a tarlang.

Kum 45 mi French footballer hlui hian a mittui khap let zawih zawih chungin a nu, Alzheimer's natna nena hun rei tak lo inbeihpui tawhtu chu zahna leh hmangaihna lantirin a thlah liam a ni.

Evra hian social media-ah video tawi thehdarhin, Sexion D'Assaut hla 'Avant qu'elle parte' (A liam hmain) tih hla chu a sa a. Hla thu a sak chhung hian a mittui a tla lek lek reng a, a hnuah a nu pualin thu rilru khawih tak a sawi zui a ni.

Manchester United defender hlui Evra chuan, "Ka innghahna lungpui ka chan a, mahse rilru puitling leh ṭha taka awm hram hram ka tum a ni. Tunlai hian mite hian hlim reng ṭhin ka nih avangin ka la hlim reng em tih min zawt fo va. Tunah chuan ka hlim thei lo a ni. Nu la nei zawng zawngte u, thihna hian hmangaihna a titawp ngai lo va, mahse an kal liam hmain in hmangaih thu hrilh ziah rawh u. Ni tin mai hian an chhuah hmain hrilh ṭhin ula ka duh a ni. Ka hmangaih vek a che u," tiin a sawi.

A thlalak leh video dah tarlannaah Evra chuan, "Khawvel pum hian do mah che se, i nu chu i ṭhianṭha ber a ni reng ang. Khawvelah engpawh thleng se, nu hmangaihna chu a tawp ngai lo. Thlamuang takin chawl ang che, ka nu. Ka thinlungah hian i nung reng tawh ang," tiin a ziak bawk a ni.

Evra hian a nu tana zahna leh hmangaihna lantir nan hian hetiang hian video a siam vawikhatna a ni lo va, a hma pawhin a nu dinhmun khirh tak takte a lo sawi chhuak tawh ṭhin a ni. Fan ṭhenkhatten social media video a siam apianga pheikhawk pakhat chauh a bun chhan an zawh ṭum pawhin, a nu puala ti a nih thu a lo sawi tawh a. Kum 2010 khan France national team nena an awm laiin a nu chu damdawi inah luhpui a ni a, a ke veilam tan a lo ngai tawh a ni.

Pluto TV nena an inbiaknaah Evra chuan, "Mite hian comment lamah, 'engvangin nge pheikhawk pakhat chauh a bun? Pawisa a nei lo em ni?' tihte min zawt fo ṭhin a. A nihna takah chuan video ka siama pheikhawk veilam ka bun loh apiang hian ka nu pualin ka hlan ṭhin a ni," tiin a lo sawi tawh a ni.

Khami ṭum khan United defender hlui hian France camp chhuahsanin damdawi in a pan thu leh, a chhungte chu an lo ṭap nasa hle tih a sawi chhuak a: "Manager hnenah phalna ka dil a, a tukah damdawi in ka thleng a. Corridor-a ka luh khan mitin mai an lo ṭap a. Ka unaupa leh unaupui te ka hmu a, mak ka ti em em a ni. Chumi hnuah room-ah ka lut a, ka nu chu khumah lo muin ka fawp a, a kiangah ka ṭhu zui a. Puan ka hlim chiah khan a ke veilam chu tan a ni tawh tih ka hmu ta a ni.

"Chuvang chuan video ka siam apiangin ka ropui ber, ka nu tan ka hlan ṭhin. A tirah chuan thil harsa tak ni mah se, ka nu khan ke lem a vuah a, a lam leh thei hial a ni," tiin a nu huaisenna chu a lo sawi chhuak tawh a ni.