Manchester United-in season bul an ṭan chhiat em avang leh Carabao Cup aṭanga mualpho taka an tlak tak avangin, head coach Michael Carrick chuan club hotute lam kawk lovin mawhphurhna zawng zawng chu ama chungah a la vek a ni.

Old Trafford-a Nilaini zana inkhelah khan, United hian minute 10 chhung lekin si hnih faiin (2-0) hma an hruai hman a, mahse an thlahdah zui tak avangin Brighton lakah an tlawm a, inelna aṭangin an tla ta nge nge a ni. He result hi Old Trafford-a Carrick-a hmakhua atan pawh thil hlauhawm leh pawi thei tak a tling chho thei a ni.

Chief executive Omar Berrada chuan kum hnih chhunga Premier League title lak chu an thiltum ber a nih thu lo sawi tawh mah se, United hian kumin nipui transfer bazar chhung khan first-team player lak nan £155million chauh an seng a, Premier League club zingah pawh sum seng hnem lamah 10-na chauh an ni thung.

Midfield thuamṭhat nan sum tam an hman tak avangin khelmual hmun dangah squad indaihlohna an nei chho a, an player lak thar Andrey Santos leh Youri Tielemans te pawh Brighton laka an tlawm ṭum khan an che ṭha tawk lo hle bawk a ni.

Match zawhah chanchinbumite chuan transfer bazar-a player an lak dan kawngah club hotuten squad rintlak tawk pe lovin an phatsan em tiin an zawt a. Mahse Carrick chuan Berrada leh director of football Jason Wilcox te lam kawk duh lovin, team chet dan chu ama mawhphurhna a nih thu a sawi ta zawk a ni.

Carrick chuan, "Aih, aih, ngaithla teh u. Team hi keima mawhphurhna a ni a, kan chak chuan miin hna ṭha tak ka thawk an ti a, kan chak loh va result ṭha kan hmuh loh erawh chuan a tam zawk chu keima chungah a tla ṭhin a ni," tiin a sawi.

"Chuvang chuan chu chu ka pawm thlap a, engmah bihruk san ka tum lo. Thil nihphung reng a ni," tiin United boss chuan a sawi chhunzawm bawk a ni.