Manchester United rawlthar zaithiam kum 15 mi JJ Gabriel chuan club-a a registration tihtawpna (cancel registration) a thehlut thut a, hei hi Old Trafford club hotute leh fan-te tan pawh thil thleng beisei loh tak a ni.

First team-ah official match a la khel lo na a, kumin pre-season chhung khan manager Michael Carrick-a hnuaiah senior team mualah a lo inlan tawh a ni. Season liam ta khan United U18 team tan match 29-ah goal 26 ngawt mai khungin a che ṭha hle a, hmanni lawka UEFA Youth League-ah Sabah lakah hat-trick a hluat bawk.

First team-a inzehluhna tur kawng eng tak a nei nia ngaihtur a nih laiin, Gabriel hian a registration tihtawp a dil ta mai a ni. United-in a ngenna hi an la pawmsak lova, mimal taka inbiakna hmanga chinfel tumin ṭan an la mek a ni. Mahse thla leh October ni 6 hian he forward naupang hi kum 16 a tling dawn tawh avangin, an chelh zui zel theihna dinhmun a buai hle maithei a ni.

Gabriel-a pa Joe O'Cearuill hi a lo inkhelh ṭhin lai khan Republic of Ireland aiawha lo inlan tawh a ni a, hei hian Gabriel hi European passport neih theihna kawng a hawnsak a ni. European passport a neih hlauh chuan, British player pangngai angin kum 18 tlin ngai kher lovin, kum 16 a tlin aṭangin Europe khawmualpui club-ah a insawn nghal thei dawn a ni.

Premier League dan ang chuan under-17 player-te hian professional contract an ziak thei lova, scholarship ziak tur pawhin kum 16 tlin phawt a ngai a ni. Chu mai bakah, United-in a contract an tihtawpsak (terminate) a nih chauh loh chuan, season khar a nih hma chu England chhunga Premier League club danga insawn mual mual a thiang lo bawk.

He rawlthar lungawi lohna chhan ber hi United-in an Champions League 'A' list squad-ah a hming an tarlang ve lo nia hriat a ni a, hei hian hmannia Sabah laka inkhelh theihna hmun pawh a hmaih tir a ni.

Gabriel-a'n United chhuahsan a dil ta mai hian Europe club liante hnar a titui hle. The Athletic-in a tarlan danin, Real Madrid, Barcelona, Paris Saint-Germain (PSG) leh Bayern Munich te chuan he United academy gem hi lakluh tumin an thlithlai tan nghal hle a ni. Real Madrid phei chuan UEFA Youth League-a Sabah laka Gabriel-a chet dan kha an scout-te hmangin an lo en reng tawh a, a theihna sang tak mai chuan an mit a ti-tluk zawk hle a ni.

United hian Gabriel-a ngenna hi hnawlsak emaw umzui rih loh emaw theihna an la nei a. Premier League dan chuan chhungkua, player leh club-te an inrem tlan vek a nih chauh loh chuan registration hi tihtawp ngawt theih a ni lo hrim hrim a ni. Mahse inremna a awm thei lo a nih chuan, a engpawh chu Premier League hotute hnenah thutlukna tawp siamsak tura ngenna thehluh theih a ni ang.