Carabao Cup-ah Manchester United chu Brighton laka 3-2 a an tlawm tak avangin inelna aṭangin an chhuak ta a. Head coach Michael Carrick-a hnuaiah Old Trafford-ah goal hnih ngawta hma hruai hman mah se, mualneitu miphurh tihniamin Brighton-in an rawn lehthal ta a ni.
Season liam taa Ruben Amorim-a hnuaia an awm lai ang bawk khan, Red Devils hian tun season-ah pawh Carabao Cup-ah match khat chiah khel hmanin inelna an chhuahsan leh ta a. Kum 2025 khan second round-ah Grimsby Town-in United hi an lo hnawtchhuak tawh a, tun ṭumah a vawi thumna (third round)-ah Brighton-in an buaipui ve leh ta thung.
Old Trafford-a 3-2 a an tlawmna hian Carrick-a hnuaiah leh Sir Alex Ferguson-a hnuaia club chanchin mualpho tak a siam belh a ni. Inelna hrang hrangah mualneitu lamin 2-0 a hma an hruai hnua Old Trafford-a an tlawm leh vawikhatna a ni a, hetiang thil hi kum 50 chhung zet thleng tawh lo a ni.
Mualneitu United tan match ṭan aṭanga minute 15 chhungin Shea Lacey leh Mason Mount te chuan goal khungin 2-0 in hma an hruaitir a. Mahse, half-time hma hret injury time-ah Brighton tan Charalampos Kostoulas chuan goal khat a rawn khung a. Second half inṭan hnuah Pascal Gross leh Maxim De Cuyper te chuan goal rawn khung lehin Brighton hi 3-2 in an rawn chak ta zawk a ni.
BBC Sport-in a tarlan danin, Manchester United-in Old Trafford-ah 2-0 a hma an hruai hnua an tlawm hnuhnung ber chu September 1976 khan a ni a. Khami ṭum khan manager Tommy Docherty-a hnuaiah Steve Coppell leh Stuart Pearson te goal hmangin League Division One match-ah 2-0 in hma an lo hruai tawh a, mahse second half-ah Ralph Coates, Ian Moores leh John Pratt te goal hmangin Tottenham Hotspur chuan 3-2 in an rawn lehthal ve bawk a ni.
Manager hlui Ruben Amorim-a'n thla 14 chhung Old Trafford-a club a enkawl lai khan sawisel a tawk nasa hle a, January thla khan a hna aṭanga ban a lo ni tawh a nih kha. Amorim-a hmachhawn loh leh a tawn miah loh kum 50 chhunga Old Trafford record ṭha tak chhiatna hi Carrick-a hmingah a chuang ta thung.
Premier League-a Manchester City an hneh loh hnua Carabao Cup-ah Brighton laka an tlawm leh tak avangin, United hian a zawnin match hnih an tlawm ta a ni. Craven Cottage-ah Fulham panin an zin zui dawn a, hei hi extended October international break hmaa Premier League match an khelh hnuhnung ber tur a ni ang.
