Manchester United tan Carabao Cup-a Brighton an hmachhawn ṭum hian thil duhawm lo tak tak a thleng a, mahse first-team tana a vawikhat nan bul ṭantu (full debut) kum 19 mi Shea Lacey-a'n minute 8-na leka goal a khung hnuah United badge a fawp zui mual mual mai kha chu, an zan thim tak zinga beiseina eng awmchhun a ni. Goal hnih ngawta hma an hruai hnuah United hi an tlawm zui ta tho a ni.
He match hma lawk hian, United chhungrila boruak tibuaitu lian tak chu club chhuahsan a dil thu puangtu kum 15 mi JJ Gabriel-a chanchin a ni. Head coach Michael Carrick-a'n Gabriel hi squad-a telh a, bench aṭanga luhtirin United chanchina debut siam thei naupang ber nihtir a lo ruahman tawh nia sawi a ni a. Mahse, Gabriel-a'n club chhuahsan a tum tak avangin he inelna hi in lam aṭangin a thlir ta zawk a, a aiawha rawn inlan Lacey-a'n fan 80,000 hmaah chawimawina a dawng ta zawk a ni.
Gabriel-a thuthang a darh hnu darkar tlemteah, Liverpool-a piang winger Lacey hian Old Trafford a thlenna thlalak chu social media-ah heart emoji nen a post a. Carrick-a tan pawh Brighton laka Lacey-a bul ṭantir mai chu thutlukna awlsam tak a ni. Lacey hi a dawhthei em em a, a hun ṭha a thlen hma chu rilru fim putir in rinawm takin a inbuatsaih char char a ni.
Gabriel-a aiin kum li ngawta u zawk Lacey hian taksa hliam tenau hrang hrang paltlangin he dinhmun hi a thleng a. Gabriel-a hming hi 'Kid Messi' tiin YouTube lamah a lar hma hle chungin, United academy coaching staff-te chuan Lacey-a theihna pawh hi an lo ngaihven em em ṭhin a ni. Season liam ta khan Aston Villa, Brighton leh Burnley lakah te khelmualah a lo inlan tawh a, Under-21 manager Adam Lawrence pawhin Lacey-a ball khawih dan chu "first-team level" hial a nih thu a lo sawi tawh bawk a ni.
Brighton laka a goal khung dan pawh hi academy-a a lo tih pui tawh ṭhin, mual dinglam aṭanga chhung lam panga rawn phei a, a ke veilama chiang taka pet lut a ni a. Old Trafford mipui pawh an au dur dur hle. Lacey hian naupan laiin Liverpool academy a zawm hman a, mahse a pa chuan United-in academy player-te first team-a an chhawr zui ṭhinna sulhnu ropui tak an neih avangin United academy zawm hi a thlang ta zawk a ni. United hian October 30, 1937 aṭang khan matchday squad tinah academy player vawikhat tal an telh ziah a, he Brighton match hi an academy player an telh a zawnin match 4,367-na chiah a ni.
He match-ah hian academy graduate Marcus Rashford-a'n bul a ṭan a, Mainoo, Amass leh Tyler Fletcher-te chu bench-ah an awm bawk. Score 2-2 a nih lai, minute 66-naah Lacey hi lakchhuah a ni a, hemi hnu hian United hi an tlawm zui ta a, hei hian manager Michael Carrick-a laka pressure a tizual hle a ni. Heti a nih lai hian Gabriel-a chhuah tumna chungchanga United sawisel duh awm bawk mah se, club hian he naupang hi humhim turin theih tawp an chhuah thlap tih a lang a, Lacey-a goal khung erawh chu he zan beidawhawm tak zinga United fan-te tana lawmna awmchhun a ni thung.
