Carabao Cup-a Brighton laka Manchester United an tlawm hnuah, head coach Michael Carrick chuan rawlthar JJ Gabriel-a hmabak chungchanga club chhunga inbiakna neih mekah a inrawlh ve ngei tih a nemnghet ta a. Kum 15 mi forward theihna ngah tak Gabriel-a hmabak chungchang hian ni tlem te kalta chhung khan chanchinbu hmai a luah hneh hle a ni.

Thawhlehni khan Gabriel hian Old Trafford chhuahsan a dil thu a rawn chhuak a, hei hian United hotute a ti-thawng hle a ni. A chhan chu Brighton nena an inkhelh hmain a debut siamtir tumin squad-ah telh an lo rilruk lawk diam tawh vang a ni a. Nilaini zan khan khelmualah lo inlan se chuan, he rawlthar hi Manchester United chanchina an first-team tana match khel thei naupang ber a ni hial dawn a nih kha.

Brighton an hneh loh hnua chanchinbumite a kawmnaah, Carrick chuan Gabriel-a chungchang zawhna chu dawngin: "He thil thleng leh a boruak zawng zawng hi kan fimkhurpui hle a ngai niin ka hria," tiin a sawi a. Carrick chuan sawi chhunzawmin, "Kum 15 mi naupang mai a la ni a, keima mimal thlirna aṭang leh club thlirna aṭang pawhin, kan player naupang zawkte enkawlna kawng te, an hamṭhatna tur leh an himna bakah, chanchinbute hmaa an lanchhuah tam lutuk loh nan kan ngaihtuah a ngai a ni. He dinhmunah hian keini zawng zawng hian chu chu ngun takin kan hriat a, kan hriatthiampui a ngai a ni," tiin a sawi.

Gabriel-a hmabak tur chungchanga inbiakna neih mekah hian amah ngei a inrawlh ve nge, club hotute kutah a dah tawp tih an zawhna chu chhangin Carrick chuan, "Aih, club ang tak takin he inbiaknaah hian kan tel vek a ni. Hetiang thilah hi chuan kan fimkhur hle a ngai tih hi ka ngaihdan a ni reng mai," tiin a chhang a ni.

Carrick hian Sky Sports a kawmnaah pawh Gabriel-a chungchang hi thil uluk leh fimkhur taka buaipui ngai a nih thu a sawi nawn leh a. "Naupang a nih anga JJ-a enkawlna, a hamṭhatna leh a chungchanga kan ngaihsakna hi a la pawimawh ber a ni. Tlangval naupang tak a la ni miau a. Dinhmun chu a nihna ang ang hi a ni mai a, mahse he thilah hian chanchinbute leh mipui hmaa an inlar tam lutuk turah hian kan fimkhur a ngai a ni," tiin a sawi zui bawk.

United hotute chuan Gabriel-a contract-ah hun eng emaw chen a la bak avangin he dinhmun hi la siamṭhat theih maiah an la ngai a ni. Tun dinhmunah Gabriel hi club hming ziahna (registration) aṭangin de-register theih a ni lo a, mahse Irish passport a neih ve tho avangin, thla thara kum 16 a tlin hunah ram dang club-te nen indawrna a nei thei dawn a ni. United lam erawh chuan an academy chhuak rawlthar theihna sang tak mai hi Old Trafford-a la chelh zui theih ngei an duh hle a ni.