Manchester United boss Michael Carrick-a tan an captain Bruno Fernandes-a form chhia hi harsatna lian tak a rawn ni chho mek zel a ni.

Carrick-a'n Atletico Madrid an hmachhawn hmain Fernandes-a'n hliam tuar chungin a khel ṭhin tih a lo nemnghet tawh a. Mahse, heti chung hian United starting line-up-ah hmun a la chang chhunzawm zel a ni. Fernandes hian Atletico lakah minute 80 a khelh hnuin, Leeds United nena 1-1 a an inhnehtawk ṭum khan minute 90 a khel tluang leh a. Mahse he Portuguese midfielder chet chhiatna hian Carrick-a boruak a titawp mek a ni.

Leeds nena an inkhelah khan Fernandes hian chance vawikhat chiah a siam a, goal zawnah pet vawikhat chiah neiin tlarhma lamah hlauhawmna a thlen meuh lo. Carrick hian a tactical system siksawiin Fernandes hi mual sir lamah (out wide) a bul a ṭantir a, mahse hei hi an captain hi squad-a hmun chantir hrâm tumna ang chauhva ngaih a ni a, tun dinhmunah hetianga bul ṭantir ziah hi a khelh danin a phu lo hle.

United fan-te chuan 'TalkingPoints' forum-ah Fernandes-a chungchangah an lungawilohna an tarlang nasa hle a, mahse he buaina chinfel hi Carrick-a mawhphurhna vek a nih thu an sawi bawk. Fan pakhat markmarston chuan, "Season liam taa Player of the Season ni thei Bruno Fernandes aṭang hian Carrick-a'n a theihna sang ber a phawrh chhuak thei tawh lo hrim hrim... hei hi thil ngaihtuahawm ber chu a ni," tiin a sawi.

Bruno Fernandes-a buaina hi Manchester United tlarhma (attack) lama an harsatna tarlangtu mai a ni a, he hmuna a team ṭha ber tur hi Carrick hian a la hre lo hle. Striker Benjamin Sesko-a chawlh a ngai hian harsatna a tizual hle a. Leeds laka an inkhelh lai khan Fernandes hi 'false nine' angin a khelhtir a, he ruahmanna hi manager hrang hrang hnuaiah a lo hlawhtling ngai lo tawh hrim hrim a ni. Matheus Cunha leh Marcus Rashford te chu bench-ah dah an ni a, Rashford phei chu khelmualah a rawn lut eih lo a ni.

Amad Diallo pawh hliam aṭanga a rawn kir leh hnuin a inlan ṭha tawk lo hle. Leeds lakah chance a siam lova, goal zawnah pawh a pet lo bawk. Nikum December thla aṭang khan United tan goal a la khung leh lo a ni.

Fan dang geldroper chuan, "Team-ah ṭan lak duhna a awm lo. Bruno engmah a ti lova, Amad pawh second half khelh tir tur a ni lo. Carrick hian ruahmanna pakhatmah a nei lova, tih tur a hre lo a ni," tiin a sawi. Fan pakhat vatsal pawhin, "Tinge Bruno hian minute 90 pui tlin a khelh kher ṭhin? Carrick hian thil mak rawn thleng thut turin a beisei a nih hmel, tlarhma ruahmanna a awm lo em em a ni," tiin a sawisel bawk.

Khelmual chhunga buaina hi Carrick-a mawhphurhna vek a ni a. Fernandes-a'n a theihna sang ber a phawrh chhuak thei lo a nih chuan, Carrick hian he captain hi bench-a dah ngam turin huaisenna a neih a ngai ta a ni.