Manchester United manager hlui Erik ten Hag chuan club hruaitute chu an thutiam hlen lo leh amah thlawp tawk loah a puh a, mahse an head coach Michael Carrick erawh chuan club board thlawpna ṭha tak a dawn thu a nemnghet thung.

The Athletic nena an inkawmnaah, Ten Hag chuan Old Trafford-ah "boruak chhe tak" (toxic culture) a awm thu a lo sawi chhuak a; mahse, Carrick chuan hetiang thil hi a hun hman mek chhungin a la tawng ve lo tih a sawi a ni.

Carrick hi tun dinhmunah Ten Hag-a hun tawp lam dinhmun ang deuh chiahah a ding mek a, season bul ṭanna game 10-ah vawi hnih chiah an la chak avangin a lakah pressure a sang hle a. Kar liam ta chhung pawh khan dressing room chhung aṭangin director of football Jason Wilcox chu sawiselna a tawk bawk a ni.

FC Twente technical director ni mek Ten Hag chuan tun kar chhung khan United kalphung chu na takin a sawisel a, football leadership lamin transfer bazar-ah an puih ṭhat tawk loh bakah thlawpna tawk an pe lo niin a sawi a nih kha.

Mahse hetiang ngaihdan hi Carrick chuan a ṭawmpui ve loh thu sawiin, Old Trafford-a thutlukna siamtu a chung zawka mite thlawpna chu a dawng ṭha hle niin a tarlang. Thlawpna a dawng em tih an zawhna chu chhangin, "Aw dawng e. Tinge dawng lo tura ka inngaih tehlul ang? He dinhmunah hian ka awm a, club-a mi zawng zawng nen inlaichinna ṭha tak, ṭha takzet kan nei a ni. He lamah hian buaina leh harsatna engmah a awm lo. Football match kan chak a ngai a, chu chu kan beih mek chu a ni," tiin a sawi.

Seasom bul ṭan dan duhawm lo tak hnuaiah awm mah se, Carrick chuan Wilcox, chief executive Omar Berrada leh co-owner Sir Jim Ratcliffe te hnen aṭangin a hmabak tur chungchangah inhnemna emaw nemngheh nawnna emaw a phut hran lo tih a sawi bawk.

"Inhnemna emaw nemngheh nawnna engmah ka mamawh lo," tiin Carrick chuan a sawi a. "Thil a chiang tawk hle. Ka dinhmun ka hria a, ka mawhphurhna ka hre bawk. Thil a kal ṭha em, a aia ṭhaa tih a ngai em tih midang min hrilh kher ka mamawh lo. Keima'n ka inhre chiang a, dinhmun dik tak ka hria a, chu chu buaina pakhatmah ka nei lo," a ti.

Ten Hag-a thil sawi chu sawisel zui lutuk duh lovin "a mimal ngaihdan" a nih thu a sawi a, club hruaitute chungchangah ngaihṭhatlohna tur chhan a neih loh thu sawiin Wilcox leh Berrada te nen pawh inbiakna ṭha tak an nei ziah tih a sawi bawk. "Jason, Omar, neitute leh player-te thlengin fiah takin inbiakna kan nei ṭhin a. Kan zaia kan luan za a, hmun khata kan ṭan tlan hi a pawimawh em em a ni," tiin a tarlang.

Ten Hag khan Cristiano Ronaldo chu training-a thawkrim tawk lo leh player dangte tana nghawng ṭha lo neiiah a lo puh tawh a, Marcus Rashford pawh a theihna tlahniamah a puh bawk a ni. Real Madrid player hlui pathum Ronaldo, Raphael Varane leh Casemiro te khan team chhungah thuneihna an inchuh nasa lutuk niin a sawi bawk a nih kha.

Heng player pathumte hian club an chhuahsan vek tawh a, squad-a rawn kir leh Rashford-a inpekna leh thawhrimna erawh Carrick hian a fak thung a, Old Trafford chhungah boruak chhia a awm loh thu a sawi bawk.

"Chutiang engmah ka hmu lo. Ka kir leh aṭang khan boruak chhia ka la hre lo hrim hrim," tiin Carrick chuan a sawi a. "Player-te leh staff-te hian theihna an neih zawng zawng min hlan a ni. Game ṭha tak tak kan khel a, siamṭhat ngai leh beisei ang pha lo match te pawh kan nei a, tihsual pawh kan nei bawk. Chu chu football a ni a, hmasawn tura inrahbi a ni bawk.

"Mahse squad ṭha tak nei lo ta ila, an theihna lam aia khelmuala an inpekna leh rilru kan put dan hi a pawimawh zawk a; inpumkhatna lian tak a awm a, tihṭhat duhna leh inlungrualna a lian em em a ni. Chuvangin team inpumkhatna kawngah chuan ka lawm tawk em em a ni," tiin a sawi zui bawk.