Pathianni hian Manchester United leh Manchester City te chu tun season-a an derby match hmasa berah mual chhungah nasa takin an inbei dawn a ni.
Mahse Old Trafford khelmual eng piah lamah hian indo dang a chhuak mek a - chu chu ram chhunga academy rawlthar theihna nei ṭha ber berte inchuhna a ni. Tun kar chhung ngei pawh hian rawlthar beiseiawm tak pahnih David Eze leh Karim Cassim te chuan City chhuahsanin United an zawm a ni.
Eze leh Cassim te hi ram chhunga club lian inkara naupang zawk nih laia insawn kual ṭhin zinga entirna pahnih chauh an ni. United hian City aṭangin Darren Fletcher-a fapa phirte (Jack Fletcher leh Tyler Fletcher) an lo la tawh a, Arsenal aṭangin Ayden Heaven leh Chido Obi te an lalut bawk. City lam pawhin kum hnih liam ta khan Chelsea aṭangin Ryan McAidoo an la a, West Ham aṭangin hming langsar tak Divine Mukasa an lalut tawh bawk a ni. Kumin nipui chhung khan City chuan club lian hrang hrang, United pawh tiamin, an ngaihven em em kum 16 mi Xavier Parker chu an club-a chelh zui turin theihtawp an chhuah bawk a ni.
Kobbie Mainoo pawh hi United aia City tana khel thei a ni hial a. Kum 9 mi a nihin United academy a zawm a, mahse naupang a nih laiin United leh City academy-ah a kal tawn ṭhin. A tawpah United academy zawm a thlang ta zawk a, lak chhuah theih a nih lai pawhin City hian thlem chhuah tum ṭhin mah se, Mainoo hian United-a cham zui zel a thlang ṭhin a ni.
Club pahnihte inkarah inzah tawnna sang tak awm mah se, an inelna hi hai rual a ni lo. May thlaa City-in FA Youth Cup an lak ṭum khan trophy chawi lawmnaah coach-te hming mal te tea an chhiarchhuah avangin Darren Fletcher chu City lakah a thinrim hle a ni. City lam chuan Fletcher-a vuina chungchangah thuchhuah siam duh lo mah se, a fapate Jack leh Tyler te chu an naupan laia City academy-a tirh an nih avangin Fletcher-a thinrimna chu mak an ti hle.
First team tana player to tak tak lakluh ai chuan rawlthar theihna ngah tak tak lak hi sum leh pai ngaihtuah pawhin a hlawk thlak hle a. Sum bakah hian player naupangte hnenah first team an thlen theih dan kawng (pathway) sialsak theihna an neih ṭhat zia lantir an tum bawk a ni.
City Academy Director Thomas Krucken chuan Talking City podcast-a a sawinaah, club lian inkara player inthleng tawn hi a awm reng ṭhin thu leh, tunah erawh mipui ngaihven a hlawh zual ta zawk nia a hriat thu a sawi. "Manchester City kan nih angin a ṭha ber dinhmunah awm reng kan duh a, staff ṭha ber ber chhawra kan duh dana zirtir kan duh a, player ṭha ber ber neih pawh kan duh reng a ni," a ti. "England leh Premier League hi sumdawnna dang aiin a danglam a, club-te'n player naupang zawk lakluh hma an tum mek lai hian keini chuan theihna nei ṭha berte chu kawng fiah tak sialsakin a hma thei ang bera academy-a lakluh kan tum a ni," tiin a sawi belh bawk.
City hian player dang la ṭhin mah se, an tum ber chu tualchhung naute chu an academy-ah luh tir hma a ni. Phil Foden, Rico Lewis leh Nico O'Reilly te chu kum 10 an tlin hmain City an zawm vek a ni. United lam pawhin an academy chu a ṭha ber ni leh turin siamṭhat an tum mek a. Mainoo chuan, "United din chhuahna ber chu academy aṭanga player rawn chhuakte an ni a, hei hi a pawimawh em em a ni," a ti.
United Academy director hlui Nick Cox chuan youth system hi United thlarau laili a nih thu a sawi a. A thlaktu Stephen Torpey, City academy coach hlui pawhin academy dinhmun chawikan a tum hle a. Torpey chuan Manchester Evening News hnenah, "Khawvela academy ṭha ber leh club ropui ber nih kan duh a, chumi chu a danglam ngai lo. Kan tih theih chinah thil thar kan ngaihtuah chhuak zel tur a ni a, a ṭha ber tur mi kan thawhpui a ngai a ni," tiin a sawi chhuak a ni.
