Manchester United defender hlui Rio Ferdinand chuan a podcast-ah Glazer chhungkaw club enkawl dan chu sawiselin, an club leina pûk (loan) rul fel lova kum tin sum tam tak interest-a chawi tura club an dah tlat chhan chu zawhna lian tak a nih thu a sawichhuak.
Kum 2005 khan Glazer chhungkua hian £790m thehchhuakin Old Trafford club hi an lalut a. Malcolm Glazer chuan kum 2003 aṭang khan United share tlem (2.9% vel) a lo lei ṭan tawh a, a hnuah club pum chu an kutah a lut zui ta a ni. Mahse hetianga club an lakluhnaah hian Glazer chhungkua hian hedge fund aṭangin sum tam tak pukin, club chungah £604m vel batna (debt) an nghat zui a. Tun dinhmunah United bat pumpui hi £1.15bn vel lai a tling tawh a, he'ng zinga £578m vel hi Glazer chhungkaw leina aṭanga lo awm chhunzawm zel (legacy debt) a ni.
BBC Sport-in June thlaa an tarlan danin, United hian an bat rulh dan tur inbiakremnaah interest rate tihpunna an pawm a ngai hial a; a hmaa interest 3.79 per cent an chawi ṭhin chu puk thar atan 5.36 per cent-ah tihpun a ni.
A podcast 'Rio Ferdinand Presents'-a a sawinaah, Ferdinand chuan Glazer-te chu an club leina pûk hi rul ṭha duh lova, kum tin interest tam tak chawi tura club an dah reng chhan chu zawhna hmachhawn ngei se a duh thu a sawi.
Ferdinand chuan, "Kei chuan Glazer-te hi zawhna ka zawt ang. Ka zawhna tur chu: 'Engvangin nge in loan hi in rulh mai loh? Tichuan season tin football club tana harsatna siamtu interest £60million hi kan chawi a ngai tawh lo ang a. Kum 21 chhung kan awm chhung khan he pûk hi lo rul fel ula chuan, he £60million hi football club ṭanpui nan hmun dangah hman theih a ni dawn asin,' tiin ka zawt ang," a ti.
Ferdinand-a podcast-a inlan The Athletic reporter Laurie Whitwell chuan Glazer chhungkua'n an puk an rulh mai loh chhan chu anmahni mimal sum lakluh a khawih pawi dawn vang a nih thu hrilhfiahin, "He thil hian sum chauh an um tih a phawrhchhuak chiang hle a ni," tiin a sawi.
Hemi chhangletin Ferdinand chuan Glazer-te sum duham lutuk chu mak a tih thu a sawi zui a. Ferdinand chuan, "I sawi ang khan, tunah hian club hi hralh ta se, £5bn bawr vel lai an dawng dawn a. Chuvangin sum tam tak nen an chhuak dawn hrim hrim a ni. Chuti chung chuan hetiang dinhmunah hian sum engzat dang nge an la mamawh cheu dawn?" tiin a zawt let a ni.
Kum 2024 khan kum 73 mi British billionaire Sir Jim Ratcliffe chuan United-ah minority stake leiin co-owner a rawn ni chho a, mahse Glazer chhungkua hian club-ah share tam zawk an la chelh reng a ni.
