EFL Cup round thumna (third round) inkhelah Manchester United chuan zanin hian Old Trafford-ah Brighton & Hove Albion an mikhual dawn a, inelnaa hmalam an pan theih nana hnehna chan ngei an tum hle.

He team pahnihte hi an chanchinah vawi 38 an lo inhmachhawn tawh a. Red Devils hian vawi 23 hnehna changin, ṭum 10 an tlawm a, vawi 5 chu an inhnehtawk thung a ni.

He match hmuhnawm tak thlir hmain thil pawimawh langsar zual pathumte lo thlir hmasa ila:

Brighton hi tun hnai kum chhung hian Manchester United tana hneh harsa leh buaithlak (bogey side) tak an ni ṭhin a. Season liam ta khan Red Devils hian league-ah mualneitu leh khualmualah Seagulls hi lo hneh tawhin, Old Trafford-ah 4-2 leh Amex Stadium-ah 3-0 in an lo sawp tawh a ni. Mahse, FA Cup third round-ah erawh Brighton lakah hian 2-1 in an lo tlawm thung a nih kha. South coast club nena an match 10 hnuhnung berah United hian vawi li chiah hnehna an chang a, match ruk dangah erawh an tlawm vek thung a ni.

Michael Carrick-a'n season liam ta chanve hnuhnung lamah United chu a enkawl ṭha hle a, Premier League-ah pathumna dinhmun a luahtir a nih kha. January thla laihawl vela mawhphurhna a lak hnu khan, United hi Europe inelna leh ram chhung cup inelna dang aṭanga an lo tlak tawh avangin league match chiah a lo enkawl hman a. Chuvang chuan zanin inkhel hi Manchester United manager a nih hnua Carrick-a tana cup match hmasa ber a ni dawn a ni. Amaherawhchu, manager a nih angin he inelnaah hian tawn hriat ṭha tak a lo nei tawh a; kum 2024 khan Middlesbrough chu semi-final a lo thlenpui tawh a, khami ṭum khan Chelsea lakah an tla ta a ni.

Portugal international player pawh hian tun season-ah match 5 a khelhah goal 4 khung tawh mah se, match ṭhenkhatah erawh a khelh dan a la mumal lo deuh a. Hull City leh Manchester City laka an tlawm ṭum pawhin a theihna sang ber a phochhuak thei meuh lo a ni. Mahse, Seagulls lakah hian a che ṭha thei hle ṭhin a, Brighton lakah hian goal 6 lai a lo khung tawh a, zanin inkhelah pawh hian a theihna phochhuaka goal khung leh ngei a tum dawn a ni.