Manchester United academy rawlthar langsar kum 15 mi JJ Gabriel-a'n club chhuahsan tura registration tihtawp a dil tak avangin Old Trafford hotute an ṭhawng hle. Real Madrid leh Europe club lian dangte chuan he wonderkid hi lakluh tumin a contract-a hmun ruak (loophole) awm hmang ṭangkaiin hma an la mek a ni.

INEOS leh United co-owner Sir Jim Ratcliffe te chuan Gabriel hi Old Trafford-a chelh zui nan theihtawp an chhuah mek a ni. Gabriel-a'n club chhuahsan a dilna hi United hotute tan chuan hun harsa tak a ni a, Premier League-a player 10 nena khel Manchester City laka an tlawm hnu lawkah a thleng a ni. Brighton an hmachhawn hma ni khat chiah a awm tihin he rawlthar hian squad-a koh tel a nih hmain chhuah a ngen ta thut mai a ni.

Real Madrid hian Gabriel-a dual nationality (ram pahnih mi leh sa nihna) nena inzawm a contract-a loophole awm chu hmang ṭangkaiin lakluh an tum mek a. Madrid bakah hian Europe khawmualpuia club lian Barcelona, Paris Saint-Germain leh Bayern Munich te pawhin he kum 15 mi hi lakluh tumin an hel mek bawk a ni.

Oliver Holt-a'n a tarlan danin, Gabriel-a'n United chhuahsan a duh chhan hi he rawlthar tihsual nilovin Manchester United thuneitute (Glazer chhungkua leh Sir Jim Ratcliffe) ruahmanna leh enkawl dan fuh loh vang a ni zawk. England rawlthar theihna ngah ber zinga mi Gabriel-a chhungte tan chuan an fapa hmakhua hi Glazer chhungkua leh Ratcliffe-a te kutah vawm luh ngawt a harsa thawkhat hle a ni.

United huangchhungah thil thleng maksak tak leh pawi tak a ni a, team hotute leh academy staff-te pawhin he thil hriat thut hi harsa an ti hle. Mahse INEOS leh Sir Jim Ratcliffe-a te hian beidawn an tum chuang lo a, Gabriel-a chhungte be pawpin, contract thar ṭha zawk leh club-a a hmakhua tichiang zawka Old Trafford-a chelh zui nan theihtawp an chhuah zui zel a ni.