Manchester United captain hlui Harry Maguire chuan a khelhpui tawh zinga midfielder theihna nei sang em em Paul Pogba chu, tun dinhmunah chuan Bruno Fernandes-a'n a lehpel tawh nia a hriat thu a sawichhuak.
Kum 33 mi England defender Maguire hian kum 2019-a Old Trafford a luh hnu khan, French midfielder Paul Pogba hi United tana a vawi hnih nan a khelh lai khan mual chhungah a lo khelhpui tawh a ni. Pogba hi kum 2016 khan khawvel record thar siamin £89million ngawt sengin Juventus aṭangin United hian an lalut leh a, kum 2022 khan club hi a chhuahsan leh a nih kha. Maguire hian Pogba-a theihna hi la dah sang hle mah se, tunah erawh an captain Bruno Fernandes chu a dah sang zawk ta a ni.
Sporting CP aṭanga kum 2020-a Fernandes an lakluh lai khan Pogba hi United-ah hian a la awm reng a. Portuguese midfielder man atan hian United chuan a tirah £47m pein, inremna zawng zawng chhiartelin a man hi £67.7m zet a tling a ni. A hnu zelah Fernandes hian Maguire-a hmunruak luahin United captain a rawn ni chho a, Sir Alex Ferguson-a'n club a chhuahsan hnua player an lakluh zingah chuan thawhhlawk ber leh ṭha ber anga ngaih hial a ni. Head coach Michael Carrick-a hnuaiah pawh first-team tana player pawimawh ber a la ni chhunzawm zel a ni.
Score 90 TikTok channel-in an kawmnaah, Maguire chuan a career chhunga a lo khelhpui tawh zawng zawngte aṭanga a 'ultimate combined XI' thlang chhuak tura ngen a nihin he thu hi a sawichhuak a ni.
Midfielder ṭha ber chungchang sawiin Maguire chuan, "Midfielder ṭha berte zingah chuan ani [Pogba] pawh hi a tel chiang a, mahse tunah chuan Bruno hian a hmun hi a luahlan tawh maithei a ni," tiin a sawi.
Maguire-a ultimate XI-ah hian England tana a khelhpui ṭhin Declan Rice nen Pogba hi holding midfield role-ah a dah dun a. Fernandes chu he team-ah hian number 10 (attacking midfielder) atan a thlang a, hei hi thil mak a nih loh thu Maguire chuan a sawi bawk.
Fernandes hi dah sang zawk tawh mah se, Leicester City leh Sheffield United defender hlui hian United-a an awmdun laia Pogba-a theihna danglam bik zia chu a theihnghilh loh thu a sawi lang bawk a ni.
"Training-ah leh five-a-side game-ah chuan ani [Pogba] kha chu a mak zawk a ni, awihawm loh khawpa ṭha a ni. Dik taka sawi chuan Paul khan engkim a ti thei vek a, five-a-side khelhah kher phei kha chuan a thiam em em a ni," tiin Maguire chuan a sawi belh.
United tana a khelh chhung khan League Cup leh Europa League nomawi lo chawi tawh kum 33 mi Pogba hi, kumin nipui khan French club Monaco chuan an chhuah zalen (released) hnuah tun dinhmunah chuan club nei lo (free agent) a la ni mek a ni.
