Tun kar Nilaini zanah Carabao Cup third round match-ah Manchester United chuan Old Trafford-ah Brighton an mikhual dawn a. Major silverware chawi tuma inelna ṭan tur team pahnihte hian hliam avanga inlan thei lo player engemaw zat an nei dun a, camp pahnih aṭangin a vaia player 15 thleng pawh an inlan thei lo maithei a ni.
United hi Premier League-a Manchester derby-ah Manchester City laka 1-0 a an tlawm hnuah Carabao Cup lamah an hawi kir a ngai dawn a. Manager Michael Carrick chuan Cup inelna a ngaihsak a ngaih tak rualin, a squad-a player pawimawh ṭhenkhat chhawr theih loh a nei dawn tih a pawm a ngai a ni.
Inrinnia City an hnehlok ṭum khan left-back Luke Shaw a inlan thei lo a, he match hi hliam avanga a hmaih zawn pahnihna a ni ta a ni. Carrick chuan Shaw hi Brighton hmachhawn tur hian a fit hman a beisei thu sawi mah se, a tichiang ngam bik lo. Carrick chuan chanchinbumite hnenah, "Brighton-ah hian a fit hman maithei a, mahse thil chiang bal erawh a la ni lo. Chawlhkar engemaw zat chawlh ngai chi nilovin, ni tlemte leka inenkawl dam theih chi a ni zawk," tiin a sawi.
Kumin nipui bazara Brighton aṭanga United-in an lakluh midfielder Carlos Baleba pawhin tun season-ah match a la khel rih lo a. Seagulls-a a awm laia a kerek a tihhliam aṭanga rawn inenkawl chho mek he Cameroon international hi a recovery-ah hma a sawn chho zel a, mahse a club hlui hmachhawn tur hian a la inpeih dawn lo a ni. Carrick chuan, "Tunkar chhung hian group-ah a rawn tel ve ṭan mai lova, international break hnuah phei chuan a fit ṭha viau tawh ang," tiin a sawi bawk.
United hian Amad Diallo leh Matthijs de Ligt te pawh fitness puitling hmu leh tur an la nih avangin an chhawr thei dawn lova. Amad hi season ṭan hmaa a hliam a ni a, De Ligt erawh nikum November thla aṭang khan a hnungzang hliam vangin a la chawl chho char char a ni. Carrick chuan, "Amad hi chu inkhelh nghal mai theihna dinhmunah a la awm lova, mahse chawlhkar a liam zel rualin kan chik zel ang. Matta [De Ligt] pawh hian dam ṭha taka a rawn kir leh nan hun a mamawh chho mek a, chuvangin engtikah nge a rawn kir ang tih hian thutlukna tichiang lutuk lo zawk ila a ṭha ang," tiin a sawi.
Hemi bakah hian midfielder Manuel Ugarte leh goalkeeper Tom Heaton te pawh Brighton lakah an inlan thei dawn lo bawk a ni.
Brighton leh an manager Fabian Hurzeler tan pawh Old Trafford zinkawngah hliam nei an ngah hle bawk. Striker Stefanos Tzimas chu a tihbaipui (muscle) hliam a rawn zual leh deuh avangin a inlan thei dawn lova, Hurzeler chuan a inenkawlna kawngah harsatna tenau a tawk leh deuh tih a sawi. Yankuba Minteh leh Evan Ferguson te phei chu hun rei tak chhawr theih loh tura ngaih an ni.
Kaoru Mitoma, Jack Hinshelwood leh Mats Wieffer te pawh rawn kir leh hnai tawh mah se, international break hma chu an inlan a rinawm loh a ni. Mahse Brighton hian Premier League season bul ṭan aṭanga chawl tawh Georginio Rutter chu rawn kir leh hman turin an beisei a, Femi Azeez pawh a tihbaipui hliam aṭangin a rawn inlan leh thei maithei a, Michael Svoboda-a dinhmun erawh a la chiang lo thung a ni.
