Nilaini zanah Manchester United leh Brighton te chu Old Trafford-ah Carabao Cup third round khel turin an inhmachhawn dawn a, club pahnih tana lo khel tawh goalkeeper hlui Tomasz Kuszczak chuan he match hi a thlir dawn a ni.
Manchester United aṭanga Brighton a zawm tirh khan, Polish goalkeeper Kuszczak hian he club hi "football hmakhua" (future of football) tiin a lo hmingthang tawh a. Kum 2006 khan £2million velin United-in Kuszczak hi an la a, Old Trafford-a a awm chhungin match 61-ah clean sheet 26 neiin, Premier League title vawi li, domestic cup hrang hrang leh Champions League nomawite a lo chawipui a ni.
Kum 2012-a Watford-a loan-a a khelh zawh hnu khan, Ipswich Town-in an ngaihven ve reng laiin Kuszczak hian Brighton chu a zawm ta a. Hemi ṭum hian Kuszczak chuan khatih laia Championship club hi thil lian tak thleng thut thei dinhmunah an awm nia a hriat thu a lo sawi tawh a ni.
Kuszczak chuan, "West Bromwich Albion leh Manchester United-ah kum riat chhung Premier League football ka lo khel tawh a, Brighton-ah hian Premier League zawm leh thei turin ruahmanna leh khawvel ṭha tak an siam tawh a ni," tiin a lo sawi.
"Manager leh coaching staff, team, stadium, leh mipui pungkhawm te, training ground thar siam tumna ruahmanna thlengin sang zawka khel thei turin an inbuatsaih vek a, club lian ber nih an chakna boruak hi a tir aṭangin ka hre nghal a ni. Watford-a loan-a ka awm laia Brighton ka hmachhawn khan, an khelh dan phung khan ka rilru a la em em a - Championship team dang zawng zawng lakah an danglam tlat a, Manchester United-a ka lo awm ṭhin nen khan a inang ber a ni.
"He team hian ball pass kual leh chance siam an ngaina a, thlir an nuam hle bawk. Brighton khelh dan phung hi football hmakhua tur a ni. Club dang dawrtu ka nei nual a, mahse ka thinlung chuan he club zawm hi thutlukna dik ber a ni tih min hrilh a ni," tiin a lo sawi tawh a ni.
Kuszczak hi West Bromwich Albion-a a awm lai khan mi hriat a hlawh ṭan a, 2004/05 season-a hliam avanga Russell Hoult-a a rawn thlak hnuah 1-1 a an inhnehtawk pui a, 'Great Escape' tia sawi zui takah khan West Brom hi relegation pumpelh puitu a lo ni tawh a ni.
Brighton-ah hian kum hnih chauh hun hmang mah se, Kuszczak-a thil lo hriat lawk kha a dik ngei tih a lang zui a. Brighton hi 2016/17 season tawpah Premier League-ah an kaisang a, chuta ṭang chuan top-flight inelnaah hian an la inlan zui ta char char a ni.
Polish goalkeeper hlui hi he hlawhtlinna lian tak an chan hma kum thumah chhuakin, Wolves leh Birmingham City-ah te a khelh hnuin kum 2019 khan inkhelh a chawlhsan ta a ni. Ram tana vawi 11 a inlan hnuah, inkhelh a chawlhsan hlen hmain Poland national team goalkeeper coach hna pawh a lo chelh tawh bawk.
