Como laka tlawmthlak taka 4-1 ngawta an tlawm hnuah Manchester United chuan buaina thar an hmachhawn leh ta a, hei hian an manager Michael Carrick-a chungah pressure a titlahniam lo hle. He tlawmna hian team chhungrila boruak chhia leh intihthiamlohna pawh a phawrhchhuak zui ta bawk a ni.
Team captain Bruno Fernandes chuan tlang takin manager-in taktiki a hman dan chungchangah mipuite hmaah zawhna a siam a. Carrick erawh chuan chhang letin, match chhunga data-in a tarlan ang ngeiin, player-te thawhrit tawk loh avanga hetiang thil hi thleng a nih zawk thu a sawi chhuak ve thung.
MEN Sport-in a tarlan danin, Pathiannia mahni mual Old Trafford-a Bournemouth an mikhual turah Carrick hian team hi a enkawl zui rih dawn a. Mahse result siamṭha vatin inkhelh dan a thlak danglam thei lo a nih chuan, season a chhiat lehzual hmain club hotute chuan manager thlak thutlukna an siam ngei a ngai tawh dawn a ni. Tun dinhmunah pawh hian a thlaktu tur hming hrang hrang sawi chhuah a ni tawh bawk.
Carrick-a hi ban a ni a nih chuan, a thlaktu atana ngaihtuah hmasak ber tur chu German coach Julian Nagelsmann a ni. Bayern Munich manager hlui hi Carrick-a a ngheta ruat a nih hma, nipui chhung khan United hian an lo ngaihven tawh a. Mahse Germany national team enkawla World Cup hmachhawn a ngaih avangin an inbiakna hi a puitling thei ta lo a ni.
North America World Cup-a last-32 aṭanga Germany an tlak hnua a hna aṭanga a ban tak avangin, kum 39 mi Nagelsmann hi club football enkawl leh turin a inpeih leh ta a. The Telegraph-in a tarlan danin, Nagelsmann hian United aṭanga dawrna a hmu a nih chuan inbiakna neih a inhuam hle a, an manager thar ni thei tura tluang ber a ni mek.
Hemi rual hian Brighton boss kum 33 mi Fabian Hurzeler pawh Carrick-a thlaktu tur zinga langsar a ni a. Seagulls hi Premier League-ah pathumnaa awmpuiin Champions League khelh tlinpui tumin a che ṭha hle. Mahse The Sun-in a tarlan danin, Hurzeler-a contract-ah hian lei chhuah theihna (release clause) a awm lova, Brighton pawhin an manager hi chhuah tir an tum lo hrim hrim bawk.
Hurzeler pawh hian tun dinhmunah Old Trafford pan hi a rilruk vak lo nia tarlan a ni a, a nakin zelah Real Madrid, Barcelona, Bayern Munich emaw Arsenal te zawk aṭanga dawrna an hmu a nih chuan ngaihtuah a thlang zawk dawn a ni.
Heng bakah hian Newcastle manager hlui free agent ni mek Eddie Howe pawh candidate ṭha tak anga ngaih a ni a. Antonio Conte pawhin United enkawl phur hle mah se, a mizia leh vantaang lo taka a ṭang fawhril ṭhinna hian Manchester United boruak nen a inmil angem tih erawh zawhna awm mek a ni.
