Manchester United chuan Pathianni tlaia Premier League match-a Craven Cottage-a Fulham an hmachhawnna tur 23-man squad an puangzar ta a. Striker Benjamin Sesko chu zin chhuak zingah hmuh tel a nih loh laiin, head coach Michael Carrick chuan player pawimawh pathum—Carlos Baleba, Luke Shaw leh Matthijs de Ligt te a chhawr leh thei dawn hlauh thung a ni.

Inrinni chawhnu khan United squad te hi London khawpui pan turin Stockport Station aṭangin rel (train)-in an thawkchhuak a. Thudawnnaten an nemngheh danin Sesko chu squad zingah hian a tel ve lo a, Craven Cottage-a a inlan theih dawn leh dawn loh chu a chiang lo hle a ni. Chutih rualin Baleba, Shaw leh De Ligt te erawh Fulham hmachhawn tur hian an inpeih tawh dawn niin a lang.

Kar tawp match-a Shaw leh Baleba te an inlan theih dawn leh dawn loh chungchang Carrick-a an zawhnaah, head coach chuan: "An pahnih hian inlan theihna chance a awm ve ve a. Za a za (100%) erawh kan la chiang bik lo. [Shaw-a dinhmun hi chu] hun reilote atana hliam a ni a, inkhelh hmachhawn turin kan inbuatsaih mek a ni," tiin a sawi.

Sesko-a a inlan thei lo a nih pawhin, Carrick hian striker mumal dah lova tlarhma rem dan (striker-less attack) chu a lo ngaina tawh hrim hrim a, tlarhma lamah hian thlan tur dang a la nei nual a ni.

Manchester derby-a an tlawm bakah tun kar tir lam khan Carabao Cup third round-ah Brighton lakah an lo tla tawh bawk nen, United tan chuan Fulham lakah hnehna chan ngei a pawimawh takzet tawh a ni.

Fulham hmachhawn tur Manchester United travelling squad:

Goalkeeper-te: Senne Lammens, Karl Darlow, Dermot Mee.

Defender-te: Harry Maguire, Matthijs de Ligt, Leny Yoro, Luke Shaw, Patrick Dorgu, Noussair Mazraoui, Ayden Heaven, Lisandro Martinez, Diogo Dalot.

Midfielder-te: Bruno Fernandes, Youri Tielemans, Mason Mount, Kobbie Mainoo, Andrey Santos, Carlos Baleba.

Attacker-te: Shea Lacey, Marcus Rashford, Bryan Mbeumo, Joshua Zirkzee, Matheus Cunha.