Champions League-a Atletico Madrid laka si hnih faia an tlawm hnuah, Michael Carrick-a'n left-back-a Ayden Heaven a luhtir chu Lisandro Martinez-a thinrim ṭawng chhuahna chhan bulpui ber niin an tarlang. He Argentine defender hian 2-0 a an tlawm hnu khan United-in thlan tur player indaih tawk an neih loh avangin director of football Jason Wilcox chu a lo kawk deuh tawh a nih kha.
Martinez hian an squad neih lai chu inelna sang hmachhawn turin a ṭha tawk lo tih a sawi lang bawk a, mahse a ṭawng chhuah aṭanga darkar 24 hnuah thuchhuah siamin "a khelhpuite chu a ringtawk tawk a ni" tiin a insawifiah leh a. Hemi ṭuma a thuchhuahah hian ngaihdam dilna erawh a tel lova, a thil sawiah khan a dinhmun a sawhsawn lo hle niin a lang.
Manchester United hian tlar laili siamṭhat nan £150million vel zet sum thehchhuak mah se, Martinez-a sawi ang hian player mamawh tawk an nei lo tih chu phat rual a ni lo. Benjamin Sesko-a'n chawn ruh hliam (shin issue) a neih chhunzawm zel avangin player ṭhenkhat chu an khelhna hmun ngai lovah chhawr an ngai a, kumin nipui laia chhuah mai theih tura dah Joshua Zirkzee pawhin khelmualah hun a chang tam phah hle a ni.
Chutih rualin kum eng emaw zat chhung hliamin a tlakbuak tawh Luke Shaw chu kar khata match hnih khelhtir ziah beisei chu thil harsa tak a ni. The Sun chanchinbu tarlan danin, khualmual Madrid-a Atletico an hmachhawn ṭuma Carrick-a'n rawlthar Heaven chu left-back-a a luhtir khan United squad a pachhe tawk zia a pholang chiang hle nia Martinez-a'n a hriat avangin a thinur ta hle a ni. He report hian Martinez-a sawisel ber chu kum 18 mi Heaven nilovin, left-back thar lalut thei lo tu club board-te zawk an ni tih a tarlang chiang bawk. Newcastle United player Lewis Hall chu an transfer bazar-a an lak luh tum ber ni mah se Magpies lamin hralh an tum lova, Joaquin Seys leh Barcelona player Alejandro Balde te sawizawm ni mah se tumah an la lut ta chuang lo a ni.
Shaw hian kar eng emaw zat chhung hliam vangin inkhel a hmaih leh dawn avangin, tun dinhmunah hian United tan heng player lak theih loh te hi an mamawh thar takzet a ni. Kar tawpa Elland Road-a Leeds United an hmachhawn turah pawh Shaw hi a tel dawn lo chiang hle. The Sun tarlan zel danin, Ningani tlaia United player-ten team dinner neih an tum pawh Madrid-a an tlawm chhiat tak em avang leh Martinez-a ṭawngkam chhuak avanga boruak rit chho mek vangin ṭhulh a ni ta nghe nghe a ni.
Boruak a lian chhoh tak zel hnuah Martinez hian Instagram lamah thuchhuah thar siamin ngaihdam a dil ve ta a: "Vawiin khan club hruaitute leh manager nen kan inhmu a. Inbiakna ṭha tak a ni a, Thawhlehni zan inkhelh zawha thil thleng chungchangah ngaihdan inhrilh tawnin tlang takin kan inbia a ni.
"Mitin hian football hi thinlung taka khel ṭhin mi ka nih zia leh phur taka nung mi ka nih zia an hria. Tlawmna avanga ka rilru na chuan a hun leh a hmun dik lovah ka rilru vei zawng min sawichhuah tir a, chumi avang chuan ngaihdam ka dil duh a ni.
"Kan zavai a kan inpumkhat hunah chauh kan club hi a ṭha ber ṭhin a, kha mi ṭuma ka ṭawngkam hman khan chu chu a pui lo tih ka hria. Manchester United-a mi zawng zawng hian kan thiltum inṭawm—club leh fan-ten an phu ngei hlawhtlinna thlen tur hian theih tawp kan chhuah ṭheuh tih ka hria a ni. Tunah chuan he buaina hi kan kalsan tawh a, a ruala hnehna chang turin kan inpeih leh tawh a ni," tiin a tarlang zui a ni.
