Denmark tana UEFA Nations League match-a Wales an hmachhawn ṭumin Manchester United player Patrick Dorgu chu a hliam a, minute 30 chauh a khelh hnuah khelmual a chhuahsan a ngai ta a ni.

Norway nena an match hmasabera mual dinglam (right-wing)-a khel Dorgu hi Wales laka an inkhelh ṭum hian mual veilam (left-wing)-ah a inlan thung a. First half chawhma lam, minute 30-na velah ball nei miah lova mual sir (touchline)-a a tlan laiin a malpui hnung lam ti-rhia (hamstring) a inhliam ta a ni. Manchester United star hi Denmark medical staff-te ṭawiawmin khelmual aṭangin a chhuak a, a thlaktu atan Mohamed Daramy luhtir a ni.

Denmark hian international break chhungin match hnih khelh tur an la nei a, mahse heng match-ahte hian Dorgu hi a inlan thei dawn ta lo a ni. Denmark manager Brian Riemer chuan Dorgu hian hliam avangin camp a chhuahsan a ngaih thu Bold.dk hnenah a nemnghet a.

Riemer chuan, "Hliam a nei a, in lama a kir a ngai a ni. Tunah chuan a thlaktu tur player dang kan koh a ngai nghal dawn tih a chiang hle," tiin a sawi.

Kum 2026 January thla khan Manchester United-in 3-2 a Arsenal an hneh ṭum khan Dorgu hian goal a khung a, mahse he match-ah hian hetiang chiah hian malpui hnung hliam (hamstring injury) a lo tawk tawh a nih kha. Kha a hliam vang khan thla thum ngawt khelmual chhuahsanin a chawlh a lo ngai tawh a ni.

International break chhunga United player pawimawh tak a hliam nawn leh tak avang hian Old Trafford ṭantute tan chanchin lawmawm a ni lo hle. Season ṭan tir lamah harsatna hrang hrang hmachhawn mek United tan chuan he international break hi pawi tak a tling a ni. Manchester United hian October ni 10 khian mahni mual Old Trafford-ah Tottenham Hotspur an mikhual ang a, he match-ah hian Dorgu hi a inlan thei dawn em tih erawh hriat a la ni lo a ni.