Manchester United-a treble nomawi lo chawipui tawhtu Teddy Sheringham chuan, Pathiannia Premier League-a Manchester City nena an inhmachhawn hmain Slovenia striker Benjamin Sesko-a chungchang a sawichhuak a, Sesko-a chu United tlarhma innghahna lian ber a nih thu a sawi.
Kum 23 mi Sesko hian tun season Premier League match hmasa pathumah bench aṭangin a rawn inlan vek a, mahse inkhel bul a ṭan erawh a la awm lo thung. Season liam taa a chawn ruh (shin) hliam a tawrh avangin kumin nipui pre-season tour pawh a hmaih a, mahse muangmanga a inhliam enkawl dam a nih hnuah Michael Carrick-a naute zingah hmun pawimawh a chang chho leh mek a ni.
Ningani zan Champions League inkhelah khan United tan a vawikhat nan Sesko hian bul a ṭan a, Sabah laka 4-0 a an chak ṭum khan half-time hma chiahin goal a khung a, minute 64-naah Carrick-a'n a la chhuak a ni. Hei bakah hian Pathianni liam taa Everton nen 2-2 a an inhnehtawk ṭum pawh khan bench aṭanga rawn lutin goal a lo khung tawh bawk a. Tun 2026-27 season inelna hrang hranga United match khelh li zingah goal hnih a khung tling tawh a ni.
United leh Sabah inkhelh zawh hnuah talkSPORT-a a thusawiah, kum 60 mi Sheringham chuan tlarhmaah Sesko a inlan loh chuan Red Devils hian "innghahna tak tak (real focal point)" an nei lo ṭhin tih a sawi. Slovenia international a awm hian Bruno Fernandes, Bryan Mbeumo leh Matheus Cunha te tana inkhelh a awlsam phah zawk thu a sawi bawk.
Sheringham chuan, "Mahse engtin nge i tih ang? A velah player dang i dah ang a. Bruno a rawn inrawlh a, Mbeumo a rawn tel a, Cunha a rawn inrawlh bawk a, mahse Sesko a khelh loh chuan tlarhmaah innghahna tak tak a awm lo. Chuvang chuan City lakah hian a khelh ngei ka beisei a, United tan goal khung theihna hun ṭha a siam rualin goal chhuah loh theihna kawngah pawh a pui bawk ang," tiin a sawi.
Ineos-in RB Leipzig aṭanga kum 2025-a an lakluh hnuah, Sesko hian Old Trafford-ah a season hnihna a hmang mek a. United-a a season hmasaberah khan a che ṭha tluangtlam hle a, Sheringham chuan tlarhma laili luah tur hian Sesko hi player famkim (complete package) a nih thu a tarlang bawk.
Sheringham chuan sawi chhunzawmin: "Sesko hi ka duh em em a ni. Tlarhma a hruai a, player dangte pawh inkhelhah a ko lut thiam a, goal a khung thei bawk. Centre-forward i en chuan hetiang theihna nei hi i duh ber ṭhin chu a ni. Lone striker (mahni chauhva tlarhma laili luah) anga khelh hi a harsa em em a ni. Hmanlai kha chuan centre-forward pahnih kan nei ṭhin a, kan inthlawp tawn ṭhin.
"Didier Drogba kha hetiang kawngah hian a ber a ni maithei a, kum engemaw zat kalta khan Samuel Eto'o pawhin a khelh thiam dan a lo nei bawk. Mahni chauha tlarhma luah chunga goal khung reng hi a harsa a, keipawh ni ila harsa ka ti hle ang," a ti bawk.
Pathianni zan hian Old Trafford-ah United chuan an elpui lian Manchester City an mikhual dawn a, he derby match pawimawh takah hian Sesko hian bul a ṭan dawn em tih chu Carrick-a thutluknaah a innghat dawn a ni.
