Manchester City-in kum 2009 leh 2018 inkar chhunga nomawi an lo lak tawhte chu thiam loh an chan tak avangin chanchin ziakna bu aṭanga thaibo (wipe from record) a, paih thlauh (void) vek tur a ni tia Arsenal defender hlui Martin Keown-a'n a sawi chu Manchester United midfielder hlui Paul Scholes chuan ngaihdan a neih loh thu sawiin, Keown chu a ngaihdan atthlak tak nen kalbo turin ("do one") a hrilh zui ta nghal a ni.
Kar liam ta khan Premier League chuan City laka thubuai 115 an siamsak zinga 114-ah thiam loh an chantir thu an nemnghet a. City hi kum kua chhung zet sponsor-na lem (sham sponsorship) hmanga an sum lakluh zat chu £900million dawn laia tiphung chawp anga puh an ni. City lam erawh chuan dan bawhchhiatna engmah an neih loh thu sawiin an ṭang tlat a, Ningani liam ta khan thutlukna hi an khinglet (appeal) nghal a ni. Premier League thupuh chu an fihlimna tarlanna finfiahna rintlak leh hnial rual loh an kawl thu an sawi bawk.
City appeal-na kawnga an thil ṭanchhan lian tak pakhat nia sawi chu sum lakluh belh te hi club neitu Abu Dhabi United Group (ADUG) aṭanga lut ni lovin, Abu Dhabi sorkar aṭanga sum lut a ni zawk tih hi a ni a, hetiang inruahmanna hi Premier League dan hnuaiah phalsak a ni bawk.
City thubuai chungchang sawiho a nih mek lai hian, Scholes chuan X-ah a ngaihdan a lo tarlang ve a. "Ka khelhpui ṭhin player hluiten City hnen aṭangin trophy hlihsak ni se an ti a, mahse an medal tur erawh an duh leh si lo tih ka hre fo mai... chutiang a nih ka duh ve lo, kei chu duham tak ka ni a, ka medal tur chu ka duh a ni," tiin a lo ziak a nih kha.
Mahse he a thuziak hi Keown leh Crystal Palace chairman hlui Simon Jordan te chuan an pawmpui lo hle. Keown chuan, "Medal engzah fakau nge a mamawh cheu? Ani te chuan medal sawmpahnih (12) dawn a nei tawh a lawm, mahse a khawsak dan tur leh a ngaihtuahna chu ka khuahkhirhsak thei bik lo. Keima ngaihdanah chuan khami hun chhunga City title-te kha laklet a nih chuan tu hnenah mah pe lovin paih thlauh (void) mai tur a ni," a ti a.
Simon Jordan pawhin, "Scholes hi mi rilru puitling leh ngaihdan tluangtlam tak nei ṭhinah ka ngai a. Oldham-a manager hna a lo thawh tawhna khan a ngaihtuahna a tichhe zo tawh a nih loh vek pawhin, podcast an han nei ve thut a, ani leh Nicky [Butt] te hian thil lian tham leh inhnialna chawktho thei zawnga thu sawi ziah turah an inngai a ni maithei. Ani aia mi puitling zawk a ni tur a nia sin," a ti ve bawk.
Hemi hnu hian talkSPORT video Instagram-a an dah hnuaiah Scholes chuan a rawn chhanglet ta a ni. Jordan-a hnenah chuan, "Pot, Kettle, Black, Simon," tiin midang sawisel theih dinhmuna ding a nih loh zia a hrilh a. Keown-a hnenah pawh, "I 'season ṭhulh (void season)' tih thu lawilo tak nen khan kalbo rawh," tiin na takin a chhanglet zui bawk.
Scholes chauh hi City title hlihsak a nih tak thut pawha medal hmuh belh beisei tu United player hlui awmchhun a ni bik lo. Goalkeeper hlui David de Gea pawhin X-ah, "Chuti a nih chuan... han sawiho teh ang u. Premier League title engzat nge ka lak tawh tak le?" tiin a zawt a. Defender hlui Rio Ferdinand pawhin, "Kan cabinet-a dah belh tur Premier League medal dang a awm dawn e," tiin a lo sawi ve bawk a ni.
Scholes hian a career ropui tak chhung khan Premier League nomawi hi vawi 11 lai a chawi tawh a, a hmasa ber chu 1996 khan a ni. A hnuhnung ber chu kum 2013 khan niin, Sir Alex Ferguson-a manager a nih season hnuhnung berah United chu title a lo lakpui tawh a ni.
