Manchester United academy player hlui James Overy chuan Old Trafford a chhuahsan hmain manager hlui Ruben Amorim leh head coach Michael Carrick-a te hnuaiah training neihna hun ṭha a lo nei tawh a. Kum 18 mi right-back hian an pahniha coaching style danglam dan leh zirtirna an pek dan inthlauhna chungchang a sawichhuak a ni.
Perth khawchhuak Overy hian kum 2024 khan United academy zawmin, kum hnih chhung hun a hman hnuah kumin nipui khan Sydney FC panin club hi a chhuahsan a. Suited and Booted TV an kawmnaah Amorim leh Carrick-a te ruahmanna leh thawhdan inlohsak zia hi a sawi a ni.
Overy chuan, "Amorim-a session-ah chuan tlan a tam zawk a, a chhan chu wing-back hmanga khel kan ni a. Full-back-te kha hmalam leh hnunglam a tlan thla ual ual ṭhin kan ni a, chu chu ka tan pawh a remchang em em a ni. Chuvang tak chuan ka chungah pawh a rilru a fuk zual phah nia ngaihna ka nei a ni," tiin a sawi.
"Amorim-a awm lai khan senior team te hi ka zawm ngun zawk a, a chhan chu a session-te kha tlan leh shot neih nghal (transitional running and shots) a ni tlangpui a. Chutih laiin Carrick-a erawh chu, 'Ball i kawl tlat ang u, touch khat emaw touch hnih lekin, khingpuite ṭhendarhkawhna tur kawng panga ngawt kan nei' ti chi a ni a. An pahnih hian manager danglam tak an ni. Amorim-a'n taksa chakna leh fitness lam (physical side) a ngaihpawimawh laiin, Carrick-a erawh chuan tactic leh thiamna (tactical and technical side) a ngaihpawimawh zawk," tiin Overy chuan an danglamna a sawifiah.
Right-back a nih ang hian Overy hian Amorim-a 3-4-3 system hnuaiah beiseina sang tak a nei a. Amorim-a'n Under-18 squad aṭanga a theihna a rawn hmuhchhuahsaktu pawh kha a ni bawk. United-a a season hnuhnung berah Under-18 team-ah hmun pawimawh luahtirin, Premier League 2-ah Under-21 tan match tlem a khelh bakah, Premier League International Cup-ah Real Madrid leh Borussia Dortmund te a hmachhawn bawk a ni.
Season liam taa FA Youth Cup final-a Manchester City laka an tlawm ṭum khan substitute-in a rawn inlan bawk. Tunah chuan Australia-ah kir lehin A-League-ah Sydney FC tan Western Sydney Wanderers lakah debut a siam tawh a ni.
United manager atana ruat tirha Carrick-a chungah beiseina sang tak awm mah se, tunah chuan pressure lian tak a hmachhawn mek a. Leeds United nen an inhnehtawk hnuin United hi a zawnin match paruk chhung chak hmu tawh lovin an awm mek a ni. Chutih laiin Amorim chuan kumin nipui khan AC Milan zawmin Serie A-ah palina dinhmun an luah mek bawk. United-in Carrick-a aia Amorim-a kalphung zawk thlawp zui ta se ti a ngaihtuahna hial siamtu a tling a ni.
