Tun season Manchester United bul ṭan dan hi beisei a phak lo hle a, beisei aia a chhe zawk mah tiin a sawi theih hial ang. Nipui chhung khan inrintawkna leh phurna nasa tak nei mah se, khelmualah erawh chu boruak ṭha chu a chuai leh nghal vek a, fan-te rilruah hun kal tawha an lo tawn tawh thil ṭha lo bawk a rawn thar leh mek a ni.
United hian tun hnai kumte khan hetiang dinhmun hi an lo tawk fo tawh a, mipui tam zawk chuan a tawp dan tur chu an hre sa vek hial tawh awm e. Carrick-a'n tun kar liam ta chhunga pressure a tawrh ang hi manager-in an tawh tawh chuan, dinhmun siksawi danglam leh chu thil harsa tak a ni ṭhin.
Lehkhaphek chunga en maia team tana match awlsam tura lang te khan beisei loh zawk harsatna an rawn thlen ta hlauh a. Inelna hrang hrang game sarih an khelh tawhah vawi hnih chiah hnehna an la chang a, Premier League hmahruaitu lakah point 10 ngawtin an hnufual tawh a ni. Opening weekend-a Hull City laka an tlawm kha tun thlenga an la tuar chhunzawm a ni a, Carabao Cup-a Brighton laka an tlawm leh phei kha chu tuar thiam a har zual hle. Fulham laka hun tawp dawn lama an sut hram khan Carrick-a hma hun chungchanga chanchinbu miho sawi zui tur chu a titawp rih hram a, mahse he international break chhung hi an hman ṭangkai hle a ngai dawn a ni. Tottenham an hmachhawn hmain Carrick-a hian eng thilte nge a buaipui ngai ta le?
A hmasaberah chuan, Fulham laka an inkhelh hnu khan Matheus Cunha chuan second half tir lamah tha an nei lo tih a sawi a, mahse Carrick chuan fitness chu buaina a nih loh thu a tarlang thung. A nihna takah chuan Kobbie Mainoo, Youri Tielemans leh Bruno Fernandes te awmna tlar laili hi tlan chiam chiam leh tharum hmanga inbeihnaa che ṭha tura duan an ni lova, game thunun zawk tura duan an ni. Mahse tunlai Premier League-ah chuan chakna, tharum leh tha a pawimawh em em a ni. Chuvang chuan Brighton aṭanga lak thar Carlos Baleba hi Carrick hian a chhawr hma a ngai a ni. Baleba hi a tlan chak bakah khelmual a luah hneh em em a, a thahrui leh a khelh dan hian midfield-ah danglamna lian tak a rawn thlen thei a ni.
A pahnihnaah, Slovenia striker Benjamin Sesko chuan a chawn hliam avangin tun kar hian scan a nei leh dawn a, chawlh a ngaih leh hmel hle. Striker pangngai awmchhun a nih avangin a awm loh hi tlarhma tan channa lian tak a ni. Cunha chu false nine anga chhawr a nih laia Bryan Mbeumo leh Marcus Rashford te nena an inman tawk loh avangin inthlakthlengna a ngai tawh a ni. Mbeumo hi No. 9-ah dahin, dinglam sirah Shea Lacey emaw Amad emaw chhawr se, Cunha chu veilamah dah lehin Rashford chu bench aṭanga luhtir zawk a hun tawh mai thei a ni.
A pathumnaah chuan, United hian game an thunun thei lo hi a ni. Midfield hi Carrick-a duhthusam angin che se chuan Mainoo leh Tielemans te hian ball an tawk tam ang a, ball an chan tam bawk chuan tlan tam lutuk a ngai dawn lo a ni. Everton lakah vawi hnih hma an hruai chung pawhin an thunun zo lova, Brighton lakah 2-0 a an san hnuah pawh inkhel an thunun zo lo a ni. Carrick hian a tactics duhzawng hi a tihpuitlin thuai a ngai a, game thunun a hnehna humhim dan an thiam a ṭul tawh takzet a ni.
