Manchester United-in nipui transfer bazar laia an lak luh tum ber zinga mi, Newcastle United defender Lewis Hall chuan St James' Park-a contract pawtsei tura thutlukna a siam dan leh, a hma hun chungchanga sawi thawm awmte'n amahah nghawng a neih loh thu a sawichhuak.

Kum 21 mi left-back hi United chuan nipui transfer window chhung khan lakluh an tum hle a, mahse inremna an siam thei ta lo a ni. Hall hian tun thla tir lam khan kum 2031 thleng daih tur contract thar ziakin a hma hun chungchanga thu thangte chu a titawp a, he thutlukna a siamna chhan lian tak pakhat chu manager thar Matthias Jaissle vang a nih thu a sawi lang bawk.

Kumin nipui bazar chhung khan United hian an left-back dinhmun thuam chak an tum hle a. Mahse Anthony Gordon, Sandro Tonali leh Bruno Guimaraes te an hralh tawh avangin, Newcastle chuan an player pawimawh dang hralh chhuah lehzel chu an tum lo bur thung. Hall hi tun season-ah a khel ṭha hle a, kar liam taa Hull City 2-1 a an hneh ṭum pawh khan goal a khung nghe nghe a ni.

Transfer chungchanga thu leng velin amahah nghawng a nei em tih an zawhna chu chhangin, he full-back hian: "Aih, engmah nghawng a nei lo takzet. Club dang nena sawizawm i nih tawh chuan thil dik eng emaw i ti a ni tih i inhre thei a. Chu chu nangmah ngeiin khelmuala i theihna i pholang ṭha tihna leh player ṭha, mi puitling i nih zia pholangtu a ni.

"Thil ṭha lam zawngin ka la a, mahse chutih rual chuan hetah hian inkhelh nuam ka tih zia ka hre chiang hle a, manager thar a rawn thlen aṭang khan an thiltum leh kan thlen duhte chu ka hre bawk a ni. Inbiakna tam tak kan neih hmain, training session tam tak kan neih hma pawhin, he club tan hian manager hi a ṭha dawn hle tih ka hria a. Team ang pawhin player thar lakluh leh squad thuam chak chu thil pawimawh tak a ni tih ka hria a, chu chu kan tih takah chuan contract thar ziah chu thutlukna harsa a ni tawh lo," tiin a sawi zui bawk.

Newcastle hian match nga an khelh tawhah vawihnih hnehna changin vawikhat chiah an la tlawm a. Jaissle hian hetiang dinhmuna la inlan ngai mang lo player thar tam tak senglutin squad boruak ṭha a siam chho mek a ni. Liverpool laka hun pek belh (stoppage-time)-ah penalty a chhuah palh chung pawhin, Hall hi khelmualah a che ṭha berte zinga mi a ni chho reng a, England squad-ah pawh koh nawn a ni leh ta nghe nghe.

Hall hian season liam ta tawp lamah a form a tlak hniam deuh avangin kumin nipui World Cup-ah khan a tel ve ta lo a. Manager hlui Eddie Howe-a'n a khelhna pangngai ni lo mual dinglama a chhawr ṭhin avangin a lungawi chiah lo nia tarlan a ni a, hei pawh hi a theihna sang ber a pholang thei lo chhan pakhatah ngaih a ni bawk.

Manchester United lam erawh chuan left-back position-ah harsatna an la tawk mek zel a. Luke Shaw chu he hmuna senior player awmchhun a nih laiin, kar hnih kalta chhung khan hliam vangin a buai leh tawh a ni. Winger ni zawk Patrick Dorgu chu left-back-ah hian an chhawr lailawk a. Kar tawpa Fulham nena an inhnehtawk ṭum khan Shaw hi bul ṭantir ni mah se, second half-ah Dorgu-a'n a rawn thlak leh ta a ni.