Manchester United rawlthar theihna sang tak nei JJ Gabriel chuan Old Trafford chhuahsan a dil a, he thil hi he dinhmun hnaihtute chuan hun rei tak chhung an lo hre lawk tawh niin United legend Wayne Rooney chuan a sawichhuak.

Kum 15 mi forward theihna nei ṭha zet leh a chhungte hi Spain ram panin an thlawk chhuak tawh a, Spanish club lian Barcelona nen inbiakna an nei mek a ni. He chanchin ṭhawng tak a darh hma hian, Carabao Cup-a Brighton an hmachhawn turah Gabriel hi first team squad-a koh tel beisei a lo ni hman a ni.

A naupan laia first team-a rawn inhlangkai ve tho, tunah pawh a fapa Kai Rooney-a'n United academy-a a khelhpui mek bawk Wayne Rooney chuan United hian he rawlthar duh dan hi hun rei tak aṭangin an lo hre tawh tih a sawi a, Spain lama a kal mai theihna tur pawh thil awm thei a nih thu a tarlang tel bawk a ni.

Disney+ show 'Stick to United'-a a inlan ṭumin Rooney chuan, "He dinhmun hnaihtute zawng zawng chuan a lo thleng ngei dawn tih an hre vek a ni. Manchester United thlavang hauh sak thu-ah pawh, he naupang club-a chelh zui zel tur hian an theihna zawng zawng an seng a, engkim an ti a ni," a ti.

Rooney chuan sawi chhunzawmin, "Spain rama kal a khelh a duhna hi hun eng emaw chen chu hriat a lo ni tawh ṭhin a; ka sawi sual a nih pawhin kum eng emaw zat chhung chu hetiang thu hi hriat tur a lo awm tawh reng a ni. Theihna bik nei leh danglam tak a nih miau avangin club pawhin player dang lakah a en dan pawh a danglam ve deuh ngei ang," tiin a sawi.

Everton academy aṭanga a rawn chhuah laia a tawn hriat nen khaikhawpin Rooney chuan, "Everton-a ka awm laia chutiang dinhmuna lo ding tawh ka nih avangin hei chu ka hrethiam em em a ni. Player dang aia duhsakna i dawng a, i nu leh pate pawh thil pek an ni a, duhsak bikna danglam tak i dawng ṭhin. Player ṭha berte chelh i duh a nih chuan club-in an tih ngei ngei tur a ni bawk. Mahse hetianga thil a thleng ta mai hi chu a pawi takzet a ni, ani chu player ṭha berte zinga mi leh mipa naupang fel tak a ni si a. Beiseina a ral tawh nge a la cham thei dawn tih hriat a ni lo; mahse he thil hnaihtute zawng zawng chuan hei hi a lo thleng ngei dawn tih chu an hre sa vek niin ka hria," a ti bawk.

Gabriel hi United youth team-a rawlthar phurawm leh khelh hmuhnawm berte zinga mi a ni a. Kum 15 mi chauh la ni mah se, club Under-18 team tan match 32 a khelhah goal 29 ngawt khungin assist vawi 4 a nei tawh a ni. Chu mai bakah, Under-21 team tan vawi hnih a inlanah goal hnih khungin assist vawi hnih a nei bawk.

He thil thleng mekah hian United manager Michael Carrick chuan he rawlthar hi khelmual pawn lam boruak rit lakah venhim a duh hle a. Carrick chuan, "JJ hi mipa naupang mai a la ni a, mipui hmaa helai hmuna thil engkim pho chhuah vak loh hi a pawimawh hle a ni. Chanchinbu leh mipui sawizui a hlawh em em avangin fimkhur a, thil nih dan phung thlira he naupang hmakhua ngaihtuah hmasak ber hi a pawimawh a ni. Dinhmun chu a kal ang angin a la inchiang chho mai ang a, amah a ṭha tawk em tih hriat chian hi thil pawimawh ber chu a ni," tiin a sawi ve thung a ni.