Manchester United co-owner Sir Jim Ratcliffe-a ta, chemical company lian Ineos chuan Humberside-a an chemical plant pathumte chu an khar lailawk (mothball) dawn tih an puang a; billionaire Ratcliffe chuan UK rama gas man to lutuk chuan an thil siamchhuahna hmunpui a 'tichhe vek' tawh niin a sawi.

Sir Jim-a enkawl Ineos hian damdawi, thawmhnaw, incheina, in sakna hmanrua leh sipai hmanraw puak thei siam nana hman ṭhin raw materials te an siam chhuak ṭhin a ni. Hull-a an plant-ah hian chemical pawimawh chi thum—acetic acid, acetic anhydride, leh ethyl acetate te chu an siam chhuak ṭhin a, heng thilte siamchhuah nan leh energy atan hian gas hi nasa takin an hmang ṭhin a ni. Heng chemical-te hi chhungkuaa fai nana hmanrua, plastic leh pack-na (packaging), aspirin leh paracetamol damdawi, rawng (paints) leh chaw vawn himna thlengin nitina kan hman ṭhin thil tam takah an telh ṭhin a ni.

Ineos thuchhuah chuan heng plant zinga pahnih chuan thil siam an chawlhtir tawh thu leh, a pathumna pawh ni tlemte chhungin an chawlhtir ve nghal tur thu a tarlang. He thil thleng hian Saltend Chemicals Park-a hnathawk mi 1,000 vel a nghawng dawn a, heng zinga mi 240 vel chu Ineos hnuaia hnathawk nghet an ni. Chu mai bakah, an sumdawnna zawmpui (supply chain) huang chhungah hnathawk mi 3,000 vel dangte chungah nghawng a neih theih bawk thu an sawi.

Ineos thupuangtu chuan plant khar lailawk a nih chhung pawhin Ineos hnathawkte chu ban an ni dawn lo va, hna an chhunzawm zel dawn thu leh tumah ban tumna an neih loh thu a nemnghet a ni.

Company dintu leh chairman ni bawk Sir Jim Ratcliffe chuan, "Europe khawmualpuia plant ṭha ber berte zinga mi chu khar lailawk tura nawr luih kan ni a, UK-a gas man hi US aia a let 12 laia a san bakah China aia a let 8 laia a to tak miau avangin kan tluk thei ngang lo a ni," tiin a sawi. Ratcliffe chuan gas man to lutuk chu "kan manufacturing base leh Humberside-a mi thawhrim tak takte hna tichhetu" a nih thu a sawi bawk.

July leh September inkar khan UK-a natural gas man hi a let hnih vel zetin a sang chho a, December 2022 hnua a san ber ṭum a thleng a ni. Hei hi US leh Israel ten Iran an beihna leh Strait of Hormuz kaltlanga hriak leh gas lakluh kawngah harsatna a chhuah tak vang a ni ber.

Sir Jim hian chemical industry-in harsatna an tawh mek chu sawrkar energy leh tax policy, a bik takin carbon emissions tax te hian a tikhirh zual hle niin a sawi a. He scheme hi thil tihtawlh thiang lo (fossil fuels) hal tito tura siam a ni. Ratcliffe chuan heng thilte avang hian UK chu China leh US nena khaikhinin sumdawngte tana inelna hmun harsa takah a chhuah niin a sawi a; nikum khan Europe chemical industry chu a tawpna thleng mai thei dinhmunah a ding tih a lo vaukhannawn tawh bawk a ni.

Hetih lai hian Department for Business and Trade thupuangtu chuan, "Hei hi Ineos mimal sumdawnna thutlukna ni mah se, Saltend-a hnathawkte leh an chhungkaw tan chuan thil lungngaihthlak tak a ni tih kan hria e," a ti a. Sawrkar chuan chemical industry ṭanpui nan hma an lak mek thu leh, chemical siamchhuaktu lian bikte puihna turin £350 million an ruahman bakah, Supercharger leh British Industrial Competitiveness Scheme hmangin kawlphetha (electricity) man to lutukte chu tihhniam an tum mek thu a sawi bawk a ni.