Manchester United player leh coach hlui Phil Neville chuan kum 2013-a Sir Alex Ferguson-a'n mawhphurhna a chawlhsan hnu leh David Moyes-a'n a thlak aṭang khan United chhungril boruak chu 'circus' mai a nih tak thu a sawi. Kum 2013 khan Ferguson-a thlaktu Moyes-a hnuaia backroom staff-ah Neville hi a awm a ni.

United-a ropui taka an chet ṭhin lai leh, Sir Alex Ferguson-a hnuaia nomawi tam tak an chawi theih dan lo hmutu Neville chuan, CBS Sports Golazo hnena a sawi danin club chhungril thil thleng chuan a barakhaih hle tih a sawi. "Sir Alex Ferguson a chhuak a, David Moyes-a coaching staff-ah ka tel ve a. Club-a ka kir leh hnuah ka thil hmuh chu club ropui tak ka lo hriat ṭhin nen khan a inang ta hauh lo mai a ni," tiin a sawi.

Neville chuan sawizawmin, "Ka thil hmuh hi ka awih thei lo hial a ni. Khelmuala football aia thil dang ngaihsak zawkna ka hmu a, manager-in thutlukna hnuhnung ber a siam thei lo tih ka hmu bawk. Manager-in player lak luh tur a thlang thei lova, player an lak luhte chu khelmuala an theihna aiin an hmingthang dan te, social media-a an follower ngah dan leh sponsor an lak luh theih zat tur thlirin an thlang zawk a ni. Mak ka ti em em a, hrehawm ka ti takzet a ni," tiin a sawi bawk.

Moyes-a hnuaia thla 10 a awm chhunga a thil tawn hian tun thlengin nghawng a la neih reng thu sawiin, "David Moyes-a hnuaia thla 10 chhung ka thil tawn kha Jose Mourinho, Louis van Gaal, Ruben Amorim, Ole Gunnar Solskjaer leh tunah Michael Carrick-a ten an tawn mek nen hian a inang reng a ni. Club hi a chung aṭanga a hnuai thlengin a thara siamṭhat a ngai a ni," a ti bawk.

United hi English champion vawi 20 lo ni tawhin, Premier League title vawi 13 an la tawh a, mahse an Premier League title hnuhnung ber an lak aṭangin kum 13 ngawt a liam leh ta a ni. Ferguson-a chhuah hnuah nomawi tlem azawng chawi ve bawk mah se, tluang takin an che zui thei ta meuh lo a ni.

Ferguson-a awm laia an hlawhtlin em em chhan sawiin Neville chuan, "Sir Alex Ferguson leh CEO David Gill te khan thununna khauh tak an nei a ni. Manager pawhin thununna a nei ṭha a, club chu a sang ber aṭanga a hniam ber thlengin fel takin an enkawl a. Engpawh sawi se, a thleng nghal mai ṭhin. Mahse a kum lehah CEO thar leh manager thar an rawn awm a... chu ta ṭang chuan 'circus' mai a ni chho ta a, manager-in thununna a hloh ta a ni. Club dang i thlir chuan thil kal dan a inzul thlap ṭhin a, Manchester United-ah erawh chutiang chu a thleng ve lo a ni," tiin a sawi.

Ferguson-a chhuah hnuah manager pakhat mah kum thum aia rei an awm lo a. May thlaa manager ngheta ruat Michael Carrick chuan season liam ta khan pathumna dinhmun a luahtir thei hram a ni. Mahse, season liam taa an chet ṭhatna kha tun season-ah chuan chhunzawm a ni lo hle.

Tun season Premier League-ah United hian match khat chauh an la win a, Carabao Cup aṭangin an tla tawh a, Champions League-ah Como lakah 4-1 in an tlawm bawk. Chawlhni khan Bournemouth lakah 3-0 in an tlawm leh a, manager Carrick-a hmabak a derthawng takzet a ni. Old Trafford-ah hian buaina a tam hle a, captain Bruno Fernandes leh fan-te inkarah pawh ngaihdan inthlauhna awmin, fan-ten club hralh a nih leh ngei an phut mek a ni.

Phil Neville hian kum 1994 leh 2005 inkar khan United tan match 386 a khel tling a, league title 6 telin nomawi lian tham 14 a chawipui a ni. Kum 2005 khan Everton panin Moyes-a hnuaiah a khel a, 2013-a a chawlh hnuah Moyes-a zuiin United coaching staff-ah a zawm leh a ni. Moyes-a'n thla 10 hnuah hna a chawlhsan a, Neville erawh season tawp thleng awmin Ryan Giggs-a 'player-manager' a nih lai khan a pui zui ta a ni.