Manchester United chuan manager Michael Carrick chu hna aṭanga ban lo rih phawt an thlang a ni. Kum 45 mi hi Bournemouth laka 3-0 a an tlawm hnu khan ban mai tawh tura ngaih a ni a, mahse Inrinnia Chelsea an hmachhawn turah Old Trafford club hi a enkawl zui leh phawt dawn a ni.

Carrick-a hnuaia a season pum a enkawl hmasak ber hi a ṭan muang hle a. Premier League match riat an khelh tawhah vawikhat chiah hnehna an la chan a, ṭum li tlawmin ṭum thum an inhnehtawk tawh a ni. Carabao Cup-ah Brighton in an tirchhuak tawh a, Champions League match pathum an khelh tawh zinga pahnihah an tlawm tawh bawk.

Bournemouth laka 3-0 a an tlawm hnu khan, CEO Omar Berrada leh sporting director Jason Wilcox te chuan hmanhmawh takin inbiakna an nei a, Carrick-a hmabak chungchang hi an sawiho a ni. A thlaktu tur manager ṭha tak lakluh mai tur an hmuh zawh loh avangin, manager hi hun tlem pek belh rih chu an thutlukna a ni ta a ni.

Hemi hnu hian United legend pahnih Paul Scholes leh Nicky Butt te chuan Carrick-a hmunruak luah thei tur nia an ngaih manager pathum an thlang chhuak a, chung zingah chuan an team-mate hlui Roy Keane pawh a tel a ni. Heng legend pahnihte hian an podcast 'The Good, The Bad and The Football'-ah manager 11 hming an chhawpchhuah aṭangin pathum chiah an inrempui thei a ni.

Antonio Conte chungchangah Scholes-a'n a pawm laiin Butt-a'n a hnawl a; Gareth Southgate chungchangah Butt-a'n pawm mah se Scholes-a'n England manager hlui hi a ring tawk lo thung. Mahse Unai Emery chungchangah erawh an pahnihin thutlukna hmun khat an nei a, ruat tlak tak a nih thu an sawi a ni. A dang riat zingah Roy Keane leh Kieran McKenna te chiah an pahnih thlawpna hmu an ni. Keane chungchangah Butt chuan, "A nuam ngawt ang," tiin a sawi a, Scholes chuan nui var var chungin, "A theih lohna chhan tur ka hmu lo," tiin a chhang bawk.

Fabian Hurzeler leh Mauricio Pochettino chungchangah an ngaihdan a inthlau a, Eddie Howe, Daniel Farke, Cesc Fabregas leh Julian Nagelsmann te erawh tun dinhmun atan an hnawl ve ve a ni.

Chutih laiin, Roy Keane phei chuan Carrick-a dinhmun khirh tak chungchang hi tlang takin a sawi a, Inrinnia khualmualah Chelsea an luhchhuah hunah he manager hian rahṭha a hawn ngei a ngai tih a vawm lut nghal a ni.

'Stick to Football' podcast-a Gary Neville nena an inenkawlnaah Keane chuan, "Nikum khan he hna hi a lak a, Carrick-a a luh tirh khan, hun rei tak atan chuan a tling tawk lovang tih a tir aṭangin kan lo sawi tawh a ni. Match tlemte enkawl mai chu a harsa lo, mahse football club pui, pre-season, fan-te beiseina leh player lak luh thlengin a taka enkawl a ngai ta a. Nikum khan an che ṭha a, an match result avangin he hna hi pek ngei tur angin an sawi a. Tunah erawh result ṭha an hmu ta lo a, 'Oh, board vang a ni, Wilcox-a vang a ni, midang vang a ni' an ti leh si a ni," tiin a sawi.

Keane chuan sawi zawmin, "Michael Carrick leh a coaching staff-te - Jonny [Evans], [Jonathan] Woodgate, [Steve] Holland - te hi Manchester United-a an la awm thei hi an vannei hle a ni. Mipa an nih anga huaisenna phawrhin Inrinniah hian result ṭha an thlen ṭan tur a ni. Chelsea lakah result ṭha tak an hmuh ngei a ngai a ni," tiin a sawi bawk.