Manchester United legend Roy Keane leh Paul Scholes te chuan an goalkeeper Senne Lammens chu club tan hian a ṭha tawk lo maithei a ni tih an sawi a, United chet chhiat meknaah he goalkeeper hi an mawhpuh hle.
Kum 2025 nipui transfer bazar lai khan he Belgian goalkeeper hi Royal Antwerp aṭangin £18million-in Old Trafford-ah hian a lut a. A season hmasa berah beisei a phak hle a, mahse thla eng emaw zat kalta aṭang khan a theihna a tlahniam chho hle a ni. Kumin nipui World Cup-ah khan minute 19 chauh a khelh hnuah, quarter-final-ah Spain laka an tlawmna kawngah tihsual lian tak a nei a. Everton lakah leh a ram Belgium tana Nations League match-ah te che ṭha viau ṭhin mah se, tun season-a goal 19 a chhuah tawh zingah hian a dan theih ngei tur goal a chhuah nual nia ngaih a ni.
Fulham laka Lisandro Martinez-a'n anmahni goal-a a pet luh buaithlak tak kha Lammens hian a lo dang thei ngei tura ngaih a nih bakah, kar liam taa Bournemouth laka 3-0 a an tlawm ṭum khan Evanilson-a goal khungah khan a chesual chiang hle bawk. Chu mai bakah chu match-ah vek chuan Rayan-a pet pawh a post hnaih lam aṭangin a chhuah bawk a ni.
United dinhmun thlirletin Keane chuan 'Stick to Football' episode tharah, "Manchester United lam han thlir ila, an goalkeeper hian team a tichhe mek a nih hi, a dik em? Nikum lamah kha chuan a ṭha em em a nih kha," tiin a ngaihdan a sawichhuak a ni.
Keane chauh hi Lammens-a theihna rinhlelhtu United legend a ni lo; Scholes pawhin United chu Premier League inchuh thei dinhmunah he keeper hian a hlangkai pui thei ang em tih a chiang lo hle bawk. Thla liam ta khan 'The Good, The Bad & The Football' podcast-ah Scholes chuan, "Goalkeeper ṭha chungchuang nei lovin Premier League la thei team eng nge in hmuh tawh? Lammens hi chutiang chu a ni maithei a, ka hre bik lo, fiahna a la hmachhawn mek a ni ber. Goalkeeper ṭha chungchuang i mamawh a ni. Liverpool-ah Alisson, City team-ah, Arsenal-ah David Raya te an awm a. Man United-ah Peter Schmeichel leh Edwin van der Sar te an lo awm tawh bawk. Anni zawng zawng kha goalkeeper ropui lutuk hlir an ni. Tlarhnung aṭangin engkim i ṭan a ngai reng a ni," tiin a lo sawi tawh bawk a ni.
Lammens hi thla 12 liam ta leka lakluh ni mah se, club hian thutlukna khauh tak an siam a ngai maithei a ni; Premier League club dangte pawhin hetiang hian an ti tawh a. Arsenal chuan kum tlemte hnuah Aaron Ramsdale thlak nan Raya an hmang nghal a, Manchester City pawhin James Trafford chu Gianluigi Donnarumma an lak hmain kar tlemte chauh hun an pe a nih kha.
United hian hetiang kawng hi an zawh a nih pawhin, khelmual chhung bakah coaching staff leh club hotute thlengin chinfel ngai buaina lian zawk an nei nual thung.
Head coach Michael Carrick-a hmabak a la chiang lo hle a, mahse United hotute chuan dinhmun siamṭha turin hun remchang an la pe rih a ni. He fiahna hi Inrinni chhunah Stamford Bridge-a Premier League inkhela Chelsea an hmachhawn hunah a inṭan dawn a ni.
A hna a chan mai dawn nia sawi a nih laiin, Ningani chanchinbumite hmaa a inlan ṭumin Carrick chuan inrintawkna nei tak chungin, "Tu hnen aṭang mahin intiamkamna ka mamawh lo. Ka dinhmun hi ka hrechiang a, ka hna hi ka hria a, a mawhphurhnate pawh ka hre vek a, chuvangin hetiang chungchangah hian tu hnen aṭang mahin thutiam ka phut lo. Match zawhah khan engmah beisei ka nei lo tih ka sawi tawh a. Kan khelh dan leh result kha ka ngaihtuah a ni. Stadium chhung boruak a danglam deuh tih kha thup theih a ni lova. Ka rilrua awm awmchhun chu 'Thil siamṭha turin eng nge kan tih ang?' tih chauh hi a ni," tiin a sawi.
