Manchester United captain Bruno Fernandes chu 2026 Ballon d'Or thlannaah 27-na dinhmunah a lang a. He chawimawina hi mahni mual Old Trafford-a Bournemouth laka si thum faia an tlawm ṭuma Michael Carrick-a'n he Portuguese midfielder hi inkhelh tir lova bench-a a ṭhuttir hnu ni khat leka puanzar a ni.
Kumin 2026 Ballon d’Or hi Bayern Munich striker Harry Kane chuan a dawng a, kum 25 chhunga he chawimawina sang dawng thei hmasa ber English player a ni hial a, chawimawina semna inkhawm pawh hi Paris khawpui nilovin London-ah buatsaih a ni.
United captain Fernandes hi Bayern Munich defender Dayot Upamecano-a hnuai chiahah awmin, Al Qadsiah forward Julián Quiñones-a chung chiahah a awm a ni. Hei hi he inelnaa a hming an chhawpchhuah vawi hnihna a ni a, kum 2021-a an thlan hmasak ṭum khan 21-na a lo hauh tawh bawk.
He dinhmun a hauh hi season liam ta (2025-26)-a Fernandes-a chet ṭhat dan nen chuan a inmil lo hle. Season liam ta khan Fernandes hian England rama mimal lawmman lian tham zawng zawng a dawng fai vek a, Arsenal midfielder Declan Rice chu heng chawimawina zawng zawngah hian Fernandes-a dawtah a lang vek a nih kha. Mahse, Ballon d’Or thlannaah erawh Rice hi United captain ai hian hmun 13 ngawtin a sang zawk thung niin Sports Illustrated chuan a tarlang.
Football Writers' Association (FWA) vote-ah khan Fernandes hian vote 28 zetin Rice hi a khum a, Wayne Rooney-a'n kum 2010-a a dawn hnuah he lawmman la thei hmasa ber United player a ni. Professional Footballers' Association (PFA) Player of the Year chawimawina a lak ṭum pawhin, Fernandes chuan a khelhpuite ngeiin an thlang chu "chhuanna tham tak" a nih thu a lo sawi tawh a ni. Chance siam kawngah record thar a siam mai bakah, Carrick-a hnuaiah United chuan Champions League khel thei tura pathumna an nih theih nan Fernandes hian goal 9 lai a khung bawk a nih kha.
Mahse tun dinhmunah chuan Old Trafford-ah a dinhmun a danglam ta hle mai. An captain tel lovin United hian Bournemouth an hmachhawn a, minute 38-naah Rayan chuan mikhual lam Bournemouth tan goal hmasa ber a khung a. Minute 43-naah Marcus Tavernier chuan a khung belh leh a, minute 71-naah Evanilson chuan an goal thumna thunin 3-0 in United hi an tlawm ta a ni.
He inkhel an tlawm tak avang hian United chu a zawnin match riat ngawt hnehna chang zo lovin an awm ta. Hei hian captain Fernandes-a tana hun khirh a tawh mek chu a tisei zual hle bawk. Kar liam ta Champions League-a Como laka 4-1 a an tlawm hnu khan, Fernandes hian team tactics hman dan a lo sawisel tawh a ni.
Fernandes a chhawr loh chungchang an zawhna chu Michael Carrick chuan tlang takin chhang duh lovin, inkhelh nia thutlukna an siam ve mai pakhat a nih thu a sawi a. Club website-a a sawinaah Carrick chuan Bournemouth laka an tlawm danah chuan rilru a buai nuaih thu a sawi bawk.
Thla reilote chhungin he captain hian dinhmun inthlak danglam lian tak a hmachhawn a. Season liam taa English football chawimawina lalutu ber chu manager starting line-up pawnah a awm ta a, khawvel huapa player ranking-ah pawh a tualchhung chawimawina a laka tlawm zawk Declan Rice-a hnuai fêah a awm ta thung a ni. United hian an match lehpekah khualmualah Premier League match khel turin Chelsea an tlawh dawn a, hemi hnu hian Champions League-ah AS Roma chu Old Trafford-ah an mikhual leh bawk ang.
