Manchester United aiawh zaa zathawh neitu lian ber, Glazer chhungkua chuan Sir Jim Ratcliffe-a'n club football lam a enkawl dan avangin an lungawi lo hle nia tarlan a ni.

Tun 2026/27 season chhung hian United hian bul an ṭan chhe hle a, inelna hrang hrangah an tlachhia a ni. Kar liam ta khan Bournemouth mualah 3-0 laiin an tlawm a, Premier League match 8 an khelh tawhah point 7 chauh an hmuh avangin relegation zone chung hteah an awm mek a ni.

Europe inelna lamah pawh an dinhmun a ṭha chuang lo a, Champions League match hnuhnung pahnihah Atletico Madrid leh Como te an hneh lo bawk.

Bournemouth an hneh loh hnu khan head coach Michael Carrick chu hna aṭanga hnawhchhuah mai tura ngaih a ni a, mahse club hotute chuan mawhphurhna a la chelh zui tir ta rih a ni. A thlaktu tur coach ṭha zawn tur an hmuh mai loh bakah, amah leh a staff-te zangnadawmna (compensation) pek an hreh avangin Carrick-a hian a hna a la chelh chhunzawm rih nia sawi a ni.

Carrick-a chauh hian sawiselna a tawk lo. Ratcliffe leh a hnuai lama INEOS hotute pawh nipui transfer window chhunga an chet chhiat em avangin sawiselna an tawk nasa hle. Team tana striker lakluh loh leh tlarhnung thuamchak a nih lohna chu tihsual lian tak a ni tih a lang chiang ta hle a, director of football Jason Wilcox leh chief executive Omar Berrada te ban tura phutna pawh a zual chho hle a ni.

Club hotu liante inkarah pawh inrelbawlna lamah inhmakhawp lohna a chhuak mek bawk. Ratcliffe-a'n sum hman tlem nana hnathawktute a ban ṭhen te chu Glazer chhungkua hian an thlawp lo hle a. Daily Mail-in a tarlan danin, Glazer chhungkua hian Ratcliffe-a'n football enkawlna hna a thawh dan chu chhiatna lipuia invawmlut ang hialin an ngai ta a ni.

Glazers hnaihtu thudawnna pakhat chuan an ngaihdan tarlangin, "Thil rapthlak tak a ni a, an thil lo beisei leh an hnenah intiamna siam a nih dan nen a inmil lo hle a ni," a ti a. Chu thudawnna chuan sawi belhin, "Anni chhungkua hian hetiang hian club hi an la enkawl ngai reng reng lo," tiin a sawi bawk.

Glazer-te hian Ratcliffe-a'n a tir lama an hnena ruahmanna a chhawpchhuah ṭhin aia dang daihin hma a lak mek nia an hria a, chu chuan club chungah nghawng chhe tak a thlen mek tih an hria. Mahse Glazer chhungkuate lungawi lohna hi football inkhelh ṭhat leh ṭhat loh chungchang vanga rilru no lo chhuah mai a ni lo a, an lungngaihna ber chu club hluina leh hmingṭhatna a tlahniam tual tual a, nakina club hralh an rilruk huna an hlawkna tur a tlahniam ang tih an huphurh vang zawk a ni.