Manchester United chuan January transfer window inhawn huna Leeds United striker Dominic Calvert-Lewin an lak theih dan dinhmun chu an hrechiang ta hle niin chanchinbu hrang hrang chuan an tarlang.
United hian an striker rinrawl Benjamin Sesko-a'n hliam na tak a tawrh leh tak avangin tlarhma lamah harsatna lian tak an hmachhawn mek a. The Peoples Person-in a lo tarlan tawh angin, Sesko hian a chawn ruh (shin) hliam a tawrh nawn leh avangin kumin kum tawp thleng chu khelmual a chhuahsan a ngai dawn a ni. He hliam hi season liam taa Old Trafford-a Liverpool an hmachhawn ṭuma Ibrahima Konate-a'n pitch sira advertising board-a a nawr liam aṭanga a lo neih tawh kha a ni a, hemi avang hian season liam ta tawp lam leh pre-season pawh a lo hmaih phah tawh a nih kha.
Ningani khan chanchinbumite hmaah head coach Michael Carrick chuan Sesko hi chawlhkar eng emaw zat chhung chu a inlan thei dawn lo tih a nemnghet ta nghe nghe a ni.
Sesko a chawlh a ngaih tak miau avangin, United squad-ah hian centre-forward pangngai (natural striker) chu Joshua Zirkzee chiah an kawl tawh a. Mahse Zirkzee-a hmabak hi a chiang lo hle thung a, nipui transfer bazar chhung pawh khan Italian club hrang hrang te nen sawizawm a ni a. Transfer deadline day-ah Everton chuan lak tumin dawr mah se, a aiawh tur la hman dawn an nih loh miau avangin United chuan a chhuahna tur kawng hi an lo dahlau ta a nih kha. Carrick pawhin tlarhmaah hian Zirkzee aia mi dang chhawr a thlang zawk fo bawk a ni.
The Athletic chanchinbu mi langsar Laurie Whitwell leh Beren Cross te tarlan danin, United chuan January thlaa striker thar lakluh theihna khawvel an bihchiang mek a, an ngaihven ber zinga mi chu Calvert-Lewin hi a ni.
Whitwell leh Cross te chuan, "Manchester United chuan January thlaa centre-forward lak theih tur an melh kual mek a, an ngaihtuahnaa awm lian ber zinga mi chu Dominic Calvert-Lewin a ni. Kum 29 mi England international hi United scout leh recruitment staff-te mit fukna a lo ni tawh ṭhin a, bazar a inhawn hunah he player hi lak theih a nih dawn leh dawn loh an enfiah mek a ni. Amaherawhchu, he transfer hi tihpuitlin theihna chance chu a tlem hle tura ngaih a ni a; a chhan chu Leeds United chuan an star striker hi humhim tlat an tum dawn tlat a ni," tiin an ziak.
Calvert-Lewin hi tun season Premier League game 8 a khelh tawhah goal li ngawt a khung tawh a, Elland Road-a a season hmasa berah match 35 khelhin goal 14 lai a lo thun tawh bawk. Tun thla tir lama United leh Leeds 1-1 a an inhnehtawk ṭum pawh khan United lakah hian Calvert-Lewin hian goal a khung nghe nghe a ni.
Leeds United hian kum 2028 thlenga contract la nei he England international hnenah hian contract thar hlawk zawk ziahpui an inpeih tawh nia hriat a ni a. Chuvang chuan Old Trafford lam tan chuan kumin January transfer-ah he striker lak hi thil namai lo tak leh harsa tak a tling dawn niin a lang.
