Manchester United midfielder hlui Ander Herrera chuan Old Trafford-a a lo khelhpui tawh Paul Pogba leh Zlatan Ibrahimovic te chungchang tlang takin a sawichhuak ta.

Rio Ferdinand-a podcast "Rio Ferdinand Presents" leh Mario Suarez te nena tun kar inbiakna an neihah, Herrera hian a football career pum mai bakah United a chhuahsan dan chungchang thui tak a sawi a. Kum 2016 leh 2022 inkara Pogba-a'n United-a a hun hman dan leh, theihna sang tak nei chunga khelmualah beisei a phak tawk loh chhan hrang hrangte a phawrhchhuak a ni.

Herrera chuan £89m zeta United-in an lakluh Pogba-a theihna chungchang sawiin, French midfielder hi theihna danglam bik leh talent ropui tak nei a nih rualin, club-a a awm chhungin khelh dante a tluang pui zaizai thei lo niin a tarlang. Premier League-a Pogba-a chanchin hmun hnih a ṭhenna leh sawi zui a hlawh em em dan chungchangah, Herrera chuan thudik zep lova thil a nihna anga sawi a duh thu a tarlang a ni.

Hemi bakah hian Swedish striker lian Zlatan Ibrahimovic-a chungchang pawh sawichhuakin, dressing room-a Ibrahimovic-a nungchang leh standards a beisei sang ṭhin dan a hrechhuak a. Ibrahimovic-a inrintawkna leh 'ego' lian tak bakah, ṭhiante laka a phut sang lutuk avanga inhrifiahna leh inhmachhawnna tlem azawng an lo neih tawh dan te pawh a sawi tel a ni. Mahse, hetiang Ibra-a mizia hian team-ah tum ruhna leh win-mentality a thlen ṭhin dan erawh a fak thung.

Herrera hian Manchester United, PSG leh Athletic Bilbao-a a hun hman tawhte thlirin, tun hnaia a naupan lai club Real Zaragoza a pan leh tak thlengin a sawi chho vek a. United a chhuahsan tuma a rilru nat dan pawh sawiin, "Khatiang tuma ka chhuah dawn khan ka thinlung hi a kehchhe takzet a ni," tiin Ferdinand-a hnenah hian a rilru a lo sawihawng bawk a ni.