Manchester United striker Benjamin Sesko chu a khingpui ruh (shin) hliam avangin January thla hma a inlan thei dawn lo tih hriat a ni a, he thil hian club tlarhma hmunruak luah tura hmalak a ngaih zia a tilang chiang hle.
Kum 23 mi Slovenia international hi September 16-a Carabao Cup match an khelh aṭang khan inlan leh tawh lovin, a khingpui ruh hliam vang hian thla engemaw zat a chawlh a ngai dawn a ni. Hei hian head coach Michael Carrick-a tan tlarhma ruahmanna siam a ti harsa hle a ni.
Kumin nipui bazar chhung khan Manchester United hotute (INEOS) chuan striker thar lakluh a ngai lo tiin thutlukna an lo siam tawh a. Mahse, Sesko-a'n pre-season a hmaih nual bakah Joshua Zirkzee pawh tlarhma laili aia 'nine-and-a-half' anga inngai a nih tak avangin, Carrick chuan Matheus Cunha leh Bryan Mbeumo-te chu tlarhmaah a chhawr a ngai fo ṭhin.
The Athletic-in a tarlan danin, United chuan thlasik (January) transfer window-ah Leeds United aṭangin Dominic Calvert-Lewin lakluh theih dan an ngaihtuah mek a. Mahse, mid-season-a an elpui lian Leeds aṭanga kum 29 mi lakluh hi a harsa in a man a to hle dawn a, chuvang chuan tun dinhmun aṭangin free agent a awm mekte hi an thlir hmasak a ngai a ni.
Hemi kawngah hian PSG leh Inter Milan striker hlui Mauro Icardi chu United tana thlan tur ṭha ber a ni thei ang. Kum 33 mi Argentine striker hi mual chhung leh mual pawn lama a chanchin vangin sawi hlawh tak a ni ṭhin a, hei hi club nei lova a awm rih chhan pakhat pawh a ni maithei.
Engpawh nise, Barcelona academy chhuak Icardi hi tlarhmaa goal khung thiam tak leh penalty box chhunga che mawi em em a ni a. Sampdoria, Inter Milan, Paris Saint-Germain leh Galatasaray-ah te lo khelin a career-ah goal 250 khungin assist vawi 68 a nei tawh a ni. Season liam ta khan Galatasaray tan goal 16 a khung a ni.
Tun hnaiah a agent chuan Icardi hi Argentina-ah a kir dawn loh thu leh Europe-a khelh chhunzawm zel a duh thu a sawi bawk. United hian a hma pawhin Zlatan Ibrahimovic leh Edinson Cavani-te angin tlarhmaa tawn hriat ngah leh goal khung thiam te hi chhawr lailawk (stop-gap) atan an lo la tawh ṭhin a, Sesko-a a dam chhuah leh hma thleng Icardi-a lakluh hi INEOS tan pawh ruahmanna fuh tak a ni thei ang.
