Manchester United-in Tottenham Hotspur an hmachhawn ṭumin, bench aṭanga rawn inlan midfielder Carlos Baleba chet vel dan chu Owen Hargreaves chuan a fak hle a. Mahse Red Devils-in mi pakhat hmanga mualneitu (10-man Tottenham) an nih a, 1-0 a hma an hruai hnu pawha point 3 an hmu zo ta lo chu a pawi a tih thu a sawi bawk.
Inrinni-a Premier League inkhelah he kum 22 mi Cameroon international hian minute 60-naah Youri Tielemans rawn thlakin, midfield-ah Kobbie Mainoo nen an inkawp a. August thlaa Brighton aṭanga £70m ngawta Manchester United-in an lakluh hnua kerek hliam vang a chawlh hnuah, Red Devils tana a debut match hmasaber a hmachhawn a ni.
Brighton-a pre-season an neih laia a kerek a tihhliam avangin Old Trafford-a a inlan tur hi a tlai deuh a. Manchester player lak thar he Cameroon tlangval hian Old Trafford-ah recovery programme neiin inbuatsaihna a lo nei chho mek a ni.
First half-ah United hian harsatna buaipui nual mah se, half-time hma deuh aṭangin Michael Carrick-a naute hian inkhelh an thunun chho ṭan a. Second half-a Baleba-a rawn luh hnu phei chuan United tlar laili a zangkhai zual hle a, Bryan Mbeumo-a'n goal khungin hma an hruai phah nghe nghe a ni. Mahse, Tottenham lamin James Maddison leh Mohammed Kudus te an rawn luh tir hnuin pressure an rawn siam zui a, United hian chakna goal hum zui zo lovin an inhnehtawk ta a ni.
Premier League Productions-a a sawi hnah England midfielder hlui Owen Hargreaves chuan Baleba-a chet dan fak chungin United khelh dan erawh a lungawi loh thu a sawi a. "James Maddison a rawn lut a, inkhelah nghawng a nei zui nghal hle a, Mohammed Kudus leh Baleba te pawh rawn lutin hun ṭha tak tak an rawn thlen a ni. Mahse player pakhat aia tam kawl chung pawha point thum hmu zo lo United tan erawh a beidawng thlak hle a, point 3 hmuh ngei tur kha a ni," tiin Hargreaves chuan a sawi.
Baleba rawn luh hma hian Tielemans leh Mainoo-te hian Tottenham midfield an ngam meuh lo a ni. Sky Sports pundit Jamie Redknapp pawhin United midfield buaina chu sawichhuakin, Brighton midfielder hlui Baleba-a'n hmun pawimawh a luah chhoh ngei a rin thu a sawi. Redknapp chuan, "Tun dinhmuna an khelh danah Tielemans leh Mainoo te hi tlar lailiah chakna (energy) an tlahniam hle a, tha bah takin an khel a ni. Baleba hian tha thar rawn thlengin team-ah chakna lian tak a rawn thlen dawn a ni," tiin a tarlang.
2026-27 season ṭan a nih aṭangin United hian match 6 an khelhah point 6 chiah an la hmu a, Premier League table-ah 12-na dinhmun an luah mek a ni. Head coach Michael Carrick-a naute hian season ṭan tirah buaina an hmachhawn nasa hle a, Baleba rawn inlan thei hi tlar laili thuam chak nan beiseina lian tak a ni ang.
