Manchester United goalkeeper Senne Lammens chuan Belgium national team tana a chet ṭhat em avangin Belgian chanchinbu mite fak a hlawh hle a. Nikum hmasang lawk kha chuan manager Ruben Amorim-a'n a debut a khawtlai tir avangin United-ah beiseina sang tak nei mah se fimkhur taka thlir zui a lo ni tawh a. Mahse, a debut-ah a che ṭha em em a, hemi hnu hian hnunglam hawi tawh lovin Premier League goalkeeper ṭha berte zinga mi a ni chho ta a ni.

Tun international break chhung hian Lammens hian ram tan a theihna sang tak a pholang a, Belgian press lamin an fak nasa hle. Belgium tana goalkeeper rinrawl Thibaut Courtois-a hmunruak luah hi thil awlsam a ni lo hle a, Old Trafford-ah Sir Alex Ferguson-a thlaktu zawn hrehawm zia nen pawh a khaikhiawtute an awm hial a ni. Season liam ta inṭan tirh kha chuan Lammens hi Europe top-five league-ah pawh a la khel ngai lo va, mahse tunah chuan Belgium goalkeeper rinrawl ber a ni chho mek a ni.

Tun international break chhung hian match thum khelhah Lammens hian a hmun a humhim tlat a. Italy, Turkey leh France laka match harsa tak tak an khelhah clean sheet pahnih neiin, vawi 19 lai ball a dang (saves) a, goal khat chiah a chhuah a ni. Hei hian a ram tan "star" a nih zia a tarlang chiang hle.

Belgian chanchinbu lar *Het Nieuwsblad* chuan Lammens hian a zawnin match thum chhung national team coach rinna a hlawhchhuak tih an tarlang a. A bikin Turkey nena an inkhelh ṭuma a chet ṭhat dan thlirin, Real Madrid rawlthar Arda Guler-a tan chuan "mangchhia" (nightmare) a nih thu an ziak hial a ni. Chanchinbu chuan, "A zawnin match thum chhung national team coach rinna a phu zia a pholang nawn leh ta. Goalkeeper a nihna angin a dan tur ang apiang a dang thei a, chu chuan hmun sang tak a thlenpui a ni. Arda Guler-a tan chuan mangchhia a tling hial a ni," tiin an tarlang.

He chet ṭhatna hi Lammens tana thil pawimawh tak a ni a, a chhan chu a hmaa ram tana a inlan hnuhnung ber ṭum khan a tihsual (mistake) avangin Belgium chu World Cup aṭangin an lo tla tawh a ni. United-a a khelh dan chungchangah pawh rinhlelhna a awm hman nual a, mahse tun hnaia a chet ṭhat dan hian Manchester United chuan player danglam bik leh ṭha chungchuang tak an kawl mek a ni tih a tarlang chiang hle a ni.