Cristiano Ronaldo awm loh hlanin Bruno Fernandes chuan Portugal chu captain niin a hruai a, Denmark lakah 4-2 a hnehna an chan hnuah, Ronaldo chu an ram leh football chanchina chhinchhiahna ropui ber a la nih reng thu a hrilh zia a sawichhuak bawk. He inkhelah hian Manchester United captain Fernandes hian assist vawi hnih neiin Portugal hnehna chan kawngah thawhhlawk takin a inlan a ni.

Inrinni, October ni 3 khan The Peoples Person chuan Portugal-in Norway an hmachhawn leh hma hian Fernandes leh Ronaldo te an inbiak thu an tarlang a. Fernandes chuan Ronaldo hnenah, engpawh thleng se, Portugal national team, football leh an ram pum tana chhinchhiahna ropui ber a nihna chu a la ngai reng a ni tih a hrilh thu a sawi chhuak a ni.

Head coach Jorge Jesus nena an inkar a ṭhat loh avanga buaina thawm a rik hnuin Ronaldo hian Portugal camp a chhuahsan a nih kha. Kar liam taa Norway laka 2-1 a an chak ṭum khan Ronaldo hi a inlan tawh lo a; Denmark an hmachhawn ṭum hian Fernandes chuan captain armband hrengin an team chu hnehna a chanpui ta a ni.

Pawn lam boruak leh thawm ri velin squad chhungril a pawtṭhen nia sawi chu Fernandes hian hnawlin, national team chu lungrual tak leh inpumkhat tlat an nih thu a sawi lang bawk. Hei hi Portugal leh Manchester United hruaitu a nih anga mawhphurhna rit tak a kokia innghat hrechiangtu, chutih rual bawk a a hmaa an captain lo ni ṭhin laka zahna lantirtu player puitling tak kâ aṭanga chhuak thuchah a tling a ni.

Kum 32 mi Fernandes hian hnehna an chan ṭum hian chance vawi 5 lai siamin, assist vawi hnih a nei bawk. Minute 25-naah Gonçalo Ramos-a'n Portugal goal hnihna a khung theih nan ball ṭha tak a pe a, Ronaldo awm loh hlana Portugal-in bul ṭan ṭha an mamawh chu a rawn phuhruk nghal a ni.

A kawng (hip) hliam avangin Norway lakah khan Fernandes hi a inlan thei lo a, Denmark lakah hian a inlan theih dawn leh dawn loh chungchangah ngaihven a hlawh hle a nih kha. Mahse Denmark lakah hian rawn kir lehin Ramos-a goal a siamsak bakah, hruaitu nihna leh khelh thiamna mamawh tak inkhelah Fernandes hian khelmualah Portugal tlar hma a chawm ṭha hle.

Hetiang mizia hi Manchester United ṭantute tan chuan thil thar a ni lo. Fernandes hi a hming maia United captain ni lovin, inkhel boruak siamtu, mawhphurhna la ngamtu leh midangte tana entawntlak a ni ṭhin a, tun hnaiah ama taksa fit tawk lo chung pawhin hetiang hian a awm reng ṭhin a ni.

Head coach Jorge Jesus chuan half-time laiin Fernandes chu a khelh aia ṭhaa khel tur a nih thu a hrilh hnuah, second half-ah Fernandes hi a rawn che ṭha zual hle tih a sawi a. Coach hian second half-a a khelh dan chu fakin, Vitinha hnena ball fiah tak a pek dan chu a rawn chet ṭhat zualna entirna pakhat a nih thu a tarlang bawk.

Hei hian Fernandes-a'n captain a nih vawikhatnaah engkim a awlsam vek kher lo tih a tilang a; theihna sang zawk lantir tura ngen a nih hnuah second half-ah a rawn insiamṭha a, 4-2 a an hnehnaah assist vawi hnih neiin a tihtur a hlen chhuak a ni.

Ronaldo awm loh avangin captain thar Fernandes-a chet dan chuan mit a la em em a, mahse khelmuala a khelh ṭhatna hian he hruaitu nihna hi a phu hle tih a nemnghet thung. A hmaa captain lo ni tawh ropuina hre reng chungin, khelmualah mawhphurhna a hlen chhuak a; ram tana boruak rit tak karah United captain hian puitling takin chhanna a pe a ni.