Zirtawpnia Manchester United-in Lausanne-Sport an hmachhawn ṭum khan, head coach Michael Carrick chuan player pawlh dal (mix-and-match) hmangin team a rem a, hei hian rawlthar ṭhenkhat tana inlanna hun ṭha a siamsak a ni.
Ram tana feh chhuak first-team player leh academy player ṭha ber berte an awm bo nual avangin, Carrick-a tan player thlan tur an tlem hle a. Hemi hnuah hian Paraguayan left-back kum 19 mi Diego Leon chu rawn inlan thut-in, Carrick-a hnuaiah a vawi khat nan minute a hlawhchhuak ta a, United-a a theihna phochhuahna hun ṭha a hmu ta a ni.
Kum 2025 nipui luh tirha Old Trafford a thlen tirh khan Leon hi beiseina sang tak nen pan a lo ni tawh a, he inremna hi thla ruk liam ta aṭang tawha lo fel sa a ni. Khatih lai khan Arsenal leh Manchester City te pawhin he rawlthar hi an lo ngaihven ve hle a ni.
Leon hian kum 18 a tlin hmain Club Cerro Porteno tan senior game 33 ngawt a lo khel tawh a, young defender tan chuan tawnhriat nei ṭha tak a ni. A tlan chakna leh tlarhma lam nawr pawp ngam a nihna avangin tlarhnung rawlthar beiseiawm takah chhal a ni a. A man hi a tirah £3.3million niin, a chet ṭhat dan azirin £7million thleng a sang thei a ni.
Season liam ta khan Bryan Mbeumo, Matheus Cunha leh Benjamin Sesko te nen Old Trafford-ah phochhuah a lo ni tawh a, a man zat en pawhin senior team pan chho nghal mai tur anga ngaih a ni. September leh October inkar khan Manchester City, Brentford leh Sunderland te an hmachhawn ṭum leh, EFL Cup-a Grimsby laka an tlawm ṭumin bench-ah a ṭhu tawh a, mahse hemi hnu hian first-team squad-ah a rawn inlan zui ta miah lo a ni.
Season liam ta khan Under-21 tan vawi 17 bul ṭanin, EFL Trophy game hnih a khel a. Kumin nipui pre-season-ah pawh inlan vak lovin, Harry Amass-a hliahkhuhin a awm chho zui ta a ni. A ram Paraguay pawhin kumin nipui World Cup-a an squad puitling 26 thlan chhuah hma khan provisional squad-ah an telh a, mahse United-a a talbuai em avangin team puitlingah a tel ta lo a ni.
Amass-a'n England Under-20 a zawm a, Diogo Dalot leh Noussair Mazraoui te ram tana an feh chhuah tak avangin, Lausanne-Sport nena friendly match (United-in 2-1 a an hneha) ah Leon hian left-back-ah bul ṭanna hun ṭha a hmu ta a ni.
Carrick-a rilru a hneh tawk em tih erawh sawi theih a la ni lo. Leon hi academy level-ah theihna phochhuak tawh mah se a la puitling tawk lo hle a, Under-21-a inkhelh tam ber chu a hmabak hmasaber a ni ang. Mahse Carrington-a training-ah leh he friendly match-a a inlan hi Carrick-a mit fukna tura hun ṭha a neih chhun a ni bawk.
