Manchester United Women chuan Progress with Unity Stadium-ah Liverpool 1-0 a hnehin, inelna hrang hrangah a zawnin vawi li hnehna an chang ta.

He match-ah hian Red Devils hian tun season-a a vawikhat nan clean sheet an nei a, tlarhnung lama an nghehna chhuah lehin, manager Eva Olid-i naute hian hma an pan zel tih a lang chiang hle.

United goalkeeper Phallon Tullis-Joyce chu an chakna chhan pawimawh tak a ni a. Kum 2024-a Mary Earps-i hmunruak luah tura United number one keeper rawn ni chho he American goalkeeper hian form ṭha tak a chhunzawm zel a, Inrinni inkhelah pawh Liverpool laka zawn zat (double save) mawi tak danningin goal a chhanhim a ni.

Keeper Tullis-Joyce chungchang sawiin Olid chuan club official website hnenah: "Phallon-i hi inrintawkna pek belh tumin ka be fo a. 'Hruaitu (leader) i nih a ngai a ni' tiin ka hrilh ṭhin. Goalkeeper te hian khelmual pumlui an hmu thei vek a, chuvang chuan a hnung aṭangin hruaitu a nih a, team-ah inrintawkna leh himna a thlen a mamawh a ni," tiin a sawi.

Head coach hian Tullis-Joyce hi mize zaidam leh ṭawng tlem tak ni mah se, team tana a pawimawhna a san em avangin khelmualah hruaitu nihna tilang chho zel turin a duh tih a sawi belh bawk.

A zawnin match li hnehna chang mah se, Olid chuan a team-te chet danah lungawi lohna leh duhtawk lohna a la nei cheu a ni. Team zia (identity) chungchang sawiin, "He team identity ber chu khingpuite sang taka nawr (high press) hi a ni a. Chu chu ṭha takin an ti a, thlak ka tum reng reng lo," a ti.

Awmze nei zawk leh mawi zawka goal khung thei tura tlarhma (final third) lama inbengdaih leh inrintawkna neih tam a pawimawh thu Olid chuan tarlangin: "Tlarhma lamah leh ball kan chan laiin player-ten inrintawkna ngah zawk se ka duh a, tichuan mawi taka football khel chunga chance siamin goal kan khung thei ang a, chu chu player-te, fan-te leh mipuite pawhin an hlimpui ber ang. Hmasawnna kan nei mek tih ka hria, mahse final-third situations-ah kan ṭhat zawk a la ngai a ni. Pass hnuhnung ber leh thutlukna hnuhnung berah kan fimkhur zawk a ngai a, final third leh box chhunga kan luh tam dan en chuan inbengdai zawk ta ila goal tam zawk kan khung thei ang," tiin a sawi.

Olid hian an player-te chu a hma maia goal khungna ball pe tura hmanhmawh lutuk ṭhin an nih avangin, thil nghah dawhtheihna leh inbengdaih zawk an mamawh thu a tarlang a, mahse hei hi training leh hun a kal zel a nih chuan a rawn puitling chho vat dawn tih a nemnghet a ni. International break zawhah United Women hian October 18, Pathianni khian Charlton Athletic an hmachhawn leh ang.