Manchester United chuan football khawvela rawlthar theihna ngah tak tak zawng chhuaka lakluh hi an ruahmanna pakhatah an dah reng ṭhin. Kum khat leh a chanve liam ta chhung khan Liverpool aṭangin Isaac Konde an lalut a, Manchester City aṭangin David Eze leh Karim Cassim te an lalut bawk. Hemi bakah Colombia aṭangin Cristian Orozco leh Paraguay aṭangin Diego Leon te pawh an lo lalut tawh a ni.

German football expert Christian Falk-a tarlan danin, United chuan Bundesliga-a rawlthar langsar berte zinga mi, Bayern Munich midfielder Lennart Karl chu lakluh tumin an ngaihven chho mek a ni. Bayern board-a supervisory role chelh mek executive hlui Uli Hoeneß chuan kumin hian Karl-a chungchang sawiin, inngaitlawm taka a awm a ngai tih a lo sawi tawh a. Mahse, he a thil sawi hi club hruaitu dangte ngaihdan nen a inthlau hle a, Bayern-a nitina mawhphurhna latute chuan he rawlthar hi an ring tawk hle a, club-a chelh zui zel an duh a ni.

Falk-a tarlan danin, Germany-a an thil sawi vel hi Premier League club-te pawhin an ngaihven hle a. Arsenal, Liverpool leh Manchester United te chuan Karl-a hmabak chiang lo tur hi an thlithlai reng a ni. Kumin Ballon d'Or lawmman semnaah khan, mipa Kopa Trophy-ah kum 18 mi Karl hi Warren Zaire-Emery, Pau Cubarsi leh Lamine Yamal te dawtah palina a ni hial a ni. Karl-a man hi €60m (£50.1m) velin an chhut a, Premier League club-ten lakluh tura hma an lak ngei pawh a rinawm hle. Tun thlengin contract thar ziah chungchangah inbiakna a la awm lo bawk.

Attacking midfielder leh winger atanga khel thei Karl hi Europe-a rawlthar theihna ngah berte zinga mi a ni a, Bayern tan match 51-ah goal 10 a khung tawh a ni. Bayern chanchina Champions League-a goal khung thei naupang ber a ni bawk. Mual lailia number 10 tura chhawr emaw, mual dinglam aṭanga a ke veilam hmanga chhung lama nawr lut ṭhin, dribble thiam tak leh ball khawih vel thiam em em a ni a. Club leh ram tana a chet ṭhat em avangin Europe khawmualpuiah ngaihsan a hlawh chho hle a ni.