Manchester United goalkeeper hlui Mark Bosnich chuan an manager ropui Sir Alex Ferguson chu tactics lamah thiamna a nei lem lo tiin a sawisel a. Kum 2001-a United chhuahsana Chelsea a zawm hnu khan, he Australian keeper hian Ferguson-a player chawkphurh thiam zia chu pha lo mah se, sakawr ṭha chungchuang chunga chuang jockey satliah nen a tehkhin a ni.
Bosnich chuan, "Alex Ferguson hi manager hlun (old-fashioned) tak a ni a, tactics lamah chuan a theihna a beitham hle a ni. A thiam em em chu mel khat laia hla aṭang pawha player theihna nei ṭha hmuhchhuah leh mite fuih phurh thiam hi a ni," a ti. "Kum 13 chhung khan a fuihna kalhmang - a dik emaw a dik lo emaw - chu a hlawhtling em em a, player ṭha ber ber a thlang chhuak ṭhin bawk. United thiltihtheihna pui tak a hnungah a awm reng bawk a ni. Sakawr ṭha chungchuang i neih miau chuan a chunga chuangtu (jockey) kha mi ropui a nih kher a ngai lo," tiin a sawi.
Kum 1989 khan schoolboy niin Bosnich hian United a zawm a, mahse work visa a neih theih tak loh avangin 1991 khan Australia lamah a let leh a. Old Trafford-a hruailuttu Ferguson chuan a chan avangin a ui hle a, a bikin 1992-a Aston Villa a zawm hnua English football-a goalkeeper ṭha berte zinga mi a rawn nih chhoh khan a ui lehzual a ni. Bosnich chuan, "Kum 16 mi ka nihin Australia aṭangin min hruai a, ka thu ni lova club ka chhuahsan khan United-a kir leh turin min duh a. Mahse chhan dang vangin ka kir lo a, a lawm lo hle a ni," a ti.
Kum 1999 khan Peter Schmeichel-a hmunruak luah turin United hian Bosnich hi an la nawn leh a. Mahse a vawi hnihnaah hian thil a kal tluang tawk lo. Match 35 inlanin Premier League leh Intercontinental Cup la mah se, hliam leh khelh ṭhat tawk loh avangin a dinhmun a hniam chho a. Kum 2000-a Fabian Barthez an lakluh takah chuan goalkeeper thlan pathumnaah a tla thla ta a, 2000-01 season laiin a thlawnin (free transfer) Chelsea a zawm ta a ni.
Stamford Bridge-ah hian hliamin a tibuai chhunzawm a, September 2002 khan cocaine a hman avangin doping test a paltlang zo lo a, match nga chauh a khelh hnuah Chelsea chuan banin thla kua chhung hrem a ni zui ta a ni. Kum 2013-a a lehkhabu ziahah Ferguson chuan Bosnich chu "professional lo tak" tiin a sawi a, training-ah darkar thum lai a tlai ṭhin thu leh ei a heh lutuk thu a tarlang a ni. Hemi chhang letin Bosnich chuan, "United chanchina Ferguson-a'n vawi hnih ngawt a lakluh player awmchhun ka la ni reng a, ka season hmasa berah point 18 zeta thlauvin Premier League kan la a ni," tiin a sawi thung.
Schmeichel-a chhuah hnu khan Massimo Taibi, Barthez, Tim Howard leh Roy Carroll te hman ni mah se beisei an pha lo va, kum 2005-a Edwin van der Sar an lakluh hma chu keeper rintlak an nei hleithei lo a ni. Ferguson ngei pawhin, "Goalkeeper lak kawngah hian ka che ṭha lem lo a, Van der Sar kan nei thei kha chu malsawmna lian tak a ni," tiin a lo ziak tawh bawk.
Hemi inmil hian Michael Carrick-a enkawl Manchester United chuan Inrinni hian Stamford Bridge-ah Chelsea an luhchhuah dawn a, Carrick hian a hna humhim turin pressure lian tak a hmachhawn mek. Bournemouth leh Como laka 3-0 ve ve a an tlawm bakah, a zawnin match riat chhung hnehna an chang tawh lo a, league table-ah 16-naah awmin relegation zone aṭangin point khat chiahin an fual a, Chelsea laka point 3 hmuh chu an mamawh takzet a ni.
