Inrinni chhun dar 12:30-a Chelsea nena Premier League inkhel hmachhawn tur Manchester United player-te chu, Zirtawpni chawhnu lama London an pan tum khan rel-a chuang ve passenger dangte lakah an tlangnel lo hle a, au elna (booed) an tawk.

United manager Michael Carrick, club coaching staff leh squad te chu Inrinni inkhel tur inbuatsaih nan Zirtawpni chawhnu khan khawpui lam panin an chhuak a. United kalphung pangngaiah chuan London pan nan hian Stockport station aṭangin rel an chang tlangpui ṭhin a ni. Mahse The Overlap tarlan danin, station an pan kawngah lirthei tawt lutuk (traffic congestion) avangin United team hi an tangkhang ta tlat mai a ni.

Manchester Piccadilly aṭanga chhuak London pan tur rel pawh chu United player-te'n an nangching hman lo ang tih hlauvin minute sarih chhung zet an lo chelh a ngai ta hial a. A tawpa rel-ah hian an luh theih tak hnu chuan, rei tak an lo nghah tawh avanga thinur passenger dangte chuan player ṭhenkhat chu an lo au el ta dur dur a ni. Chutih rual erawh chuan an manager Michael Carrick-a rawn lut chu lawm takin an lo au dur dur thung a ni.

He thil thleng hi Pathianni liam taa Old Trafford-a Bournemouth laka mualpho taka 3-0 a an tlawm ṭuma thil thleng nen a inang hle. Kha match-ah khan khelmual chhuahsantu United player-te chu mahni mual neitu fan-te ngeiin thinur takin an lo au el a, mahse an coach Michael Carrick-a'n pitch a chhuahsan lai erawh chuan a hming lamin zai an lo vawrh sak thung a nih kha.

Bournemouth laka an tlawm hnu khan a zawnin match 8 chhung zet hnehna an chang tawh lo a, tun season Premier League-ah vawikhat chiah chak an la neih bawk avangin, kum 45 mi Carrick hi ban a ni mai dawn emaw tih hial a ni a. Chuti chung chuan Red Devils neitute chuan he English manager hi tun dinhmunah la kawl zui rih an thlang a, mahse engchen nge a chelh zui ang tih erawh hriat a la ni lo.

Ningani khan Carrick chuan thuthar thehdarhtute hmaah a dinhmun chungchang sawiin, "Tuma hnen aṭang mahin ka dinhmun humhimna tur thu tiam ka mamawh lo. Ka dinhmun hi ka hrethiam a, ka hna hi eng nge a nih ka hre chiang a ni. Ka mawhphurhna leh he hna vanga thil lo thlengte hi engkim ka man vek. Chuvang chuan hetiang kawngah tuma hnen aṭang mahin thutiam ka beisei lo hrim hrim," a ti.

United manager chuan sawi zawmin, "Min sawiselna awmte hi ka en buai ngai lo hrim hrim. Ka hmuh ngai thilte chauh ka en ṭhin a, sawiselna zawng ruai mi ka ni lo, chu chuan kawng engmahah min ṭanpui lo bawk. A hma pawhin ka lo sawi tawh ṭhin ang khan, kan club ṭantuten eng nge an ngaihtuah tih leh stadium chhunga an rilru puthmang hi ka ngai pawimawh ber a, kan match khel min en tur leh min ṭan tura ram hla taka an rawn zin ṭhinna hi ka ngai hlu a ni. An hnenah eng nge kan peka, mualah eng nge an hmuh tih hi ka ngaihtuah ber a ni.

"Thil dang engmah hi ka bengkhawn lo. He hna hi ka hria a, engtianga hmalak tur nge tih leh team hmasawn nana kan tih tur ka hre chiang tawk a. Midang thurawn leh sawiselna dang ka mamawh hran lo," tiin a sawi chiang hle a ni.