England head coach Thomas Tuchel chuan World Cup squad aṭanga a paih avanga Manchester United centre-back Harry Maguire-a chet dan chu a lawm loh thu a sawi chhuak. Michael Carrick-a enkawl United squad-ah player rinrawl ni chho mah se, Maguire hi kumin nipuia World Cup inelnaah khan koh tel a ni ta lo a ni.
He thutlukna avang hian Maguire chu a lungawi lo hle a, a rilru natna chu social media kaltlangin mipui hriatah a tarlang hial a nih kha. "Season ka hman ṭhat dan enin kumin nipuiah hian ka ram tan hmun pawimawh tak ka luah theih ka inring tawk hle a. He thutlukna hian min ti-bangboin min ti-lungchhe takzet a ni. Kum eng emaw zat chhung England jersey ha a, ka ram aiawh tluka ka ngaihhlut hi a awm ngai lo. Kumin nipuiah hian player-te chu duhsakna sang ber ka hlan e," tiin a ziak a ni.
He defender nu Zoe pawhin a lungawi lohna chu tarlang ve in, he thutlukna hi "tenawm tak" (absolutely disgusted) a nih thu social media-ah a tarlang a. A unaupa Joe pawhin, "He thil hi ka damchhunga thutlukna rapthlak ber a la ni hial ang. Sawi tur pawh ka hre lo," tiin a lo sawi ve bawk a ni.
Hemi hnu hian Maguire hi New York-ah zinin 'The Rest is Football' podcast-ah a inlan a. Squad-ah a tel dawn lo tih a hriat dan chungchang an zawhna chu chhangin, "Ani [Tuchel] chuan mi zawng zawng FaceTime hmangin a be kual a, inbiakna nuam lo tak a ni. Ka lungawi loh zia chu tlang takin ka sawi nghal a. Squad-a tel turin ka theihna zawng zawng ka hlan tawh a, khelmual chhung leh pawnah ka ṭanpui theih ka inring a ni. Ani chuan chhuanlam min pe thei bik lo a, mahse qualifying-a hruaitlingtu player pali te chu a thlan zawk thu a sawi," a ti.
Maguire chuan sawi zawmin, "Pawm thiam a harsa hle a ni. March thlaa a hnuaia camp kan neih ṭuma a vawikhat nan min koh khan squad-ah hian ka tel ve ngei ka ring a. Match hnih kan khelhah ka che ṭha hle a, chumi hnuah Manchester United-ah kir lehin season tawp lam kha ṭha takin ka hmang chho a ni," a ti bawk.
Nations League atana England squad thar a puan hnuah, Tuchel chuan Maguire-a chet dan avang khan a lungawi loh thu a sawi ve ta thung a. talkSPORT hnenah sawiin, "Khatianga chet kual vel khan awmzia a nei lo. A damchhungin a pawi ka sawh reng dawn lo a, chutiang mi chu ka ni lo. Awlsam tak leh rang takin thil ka theihnghilh thei a ni. Mahse khatianga a che kha ka lawm lo a, engmah ṭhatna a thlen bawk hek lo. Khami hnu aṭang khan kan la inbe leh ta miah lo a ni," tiin a sawi.
Spain, Czechia leh Croatia hmachhawn tur England Nations League squad-ah hian United player pahnih - Kobbie Mainoo leh Marcus Rashford te chu tun season-a an khelh ṭhat avangin koh an ni a.
Anni pahnih hi World Cup squad-ah pawh an lo tel tawh a, mahse Mainoo erawh khelmualah minute khat pawh a inlan ta lo a nih kha. Zirtawpnia press conference a neihah Tuchel chuan America rama he United player a khelhtir lo kha 'hrehawm a tih thu' a sawi chhuak tel bawk a ni.
