Manchester United leh England superstar hlui David Beckham chuan khelmual chhung leh pawn lamah a hming ṭha chawisang zelin, sumdawnna khawvelah a hlawhtling chhunzawm zel a, 'Brand Beckham' chu ṭhangduang takin a kal chho zel a ni. Kum 20 dawn chhung United, Real Madrid leh Paris Saint-Germain-ah te a khelh chhung khan pound maktaduai za tam tak a lo lalut tawh a, tunah hian a hausakna (net worth) pawh a sang zual chho hle.
Chanchin thar tarlan danin, kum khat tling lo chhung lekin Beckham hian pound maktaduai 38 (£38m) zet a lalut leh a ni. Kumin nipuia World Cup inelna neih laia brand hrang hrang nena inremna hlawk tak tak a ziah aṭangin hetiang zat sum hi a lalut thei a ni. Beckham-a company enkawltu DRJB Holdings sum dinhmun tihchhuah tharah, December 2025 thleng khan kum khat chhungin hlawkna (profit) £50m lai an lo la lut a ni.
He sumdawnna hmun chanve hi American company Authentic lamin an nei a, kum 2026 chhung khan shareholder-te hnenah dividend atan £38.9m leh £46.6m an sem chhuak a. Hei hian Beckham-a mimal ipteah £38m chuang a luttir a ni. Winger hlui hian McDonald's leh Pepsi ang chi brand lian tak takte nen inremna thuthlung nghet an la nei zui reng a, US ram chhungah ringawt pawh a brand hlutna hian dollar maktaduai 100 ($100m / £75m) khaan a pel hial a ni.
Tun dinhmunah hian David Beckham-a hausakna mimal hi £750m chuang tura chhut a ni a, a nupui Victoria Beckham nena an sum neih zawng zawng belhkhawm phei chu pound tluklehdingawn 1.185 (£1.185 billion) lai tling hial tura chhut a ni.
Sum lakluh lamah hma a sawn bakah, David Beckham hian Netflix tana show thar buatsaih leh a tum mek bawk. He show hian he England idol nunphung leh a chanchin thuk zawk a pholang dawn a ni. Kum 2023 khan Netflix-ah episode li awmna documentary series 'Beckham' tihchhuah a lo ni tawh a, a chhuah kar hmasa berah mi maktaduai 12.4 laiin an lo thlir tawh a nih kha. Hei bakah hian Inter Miami co-owner ni bawk Beckham hian kum 2025 khan a nupui chanchin tarlanna documentary 'Victoria Beckham' siam kawngah pawh sulsutu pawimawh a lo ni tawh bawk.
Beckham-a brand partner Jamie Salter chuan heti hian a sawi: "Netflix-a Beckham documentary a hlawhtlin em avang khan, he platform nen hian episode dang siam leh an tum a ni. David Beckham leh Netflix hian show thar dang an buatsaih leh dawn a, thil phurawm tak a ni. An series hmasa ber khan a sumdawnna chu sang takah a vawrh chho a. Chutiang chiah chuan Victoria-i documentary tihchhuah a nih hnuah a sumdawnna pawhin hmalam a pan nasa hle bawk. Beckham-a kutchhuak thar dang in la hmu ngei dawn a, content hian mipuite thinlung a khawih ber ṭhin a ni," tiin.
Chhungkaw hmingṭhatna leh sumdawnna an tihlen mek lai hian, Beckham chhungkua hian an chhungkuain member thar an lo lawmlut bawk a. David leh Victoria te fapa naupang ber Cruz (21) leh a bialnu Jackie Apostel (30) te chuan Labrador ui note an la a, a hmingah 'Sandy Jean Beckham' tiin an sa a ni. Cruz hian Instagram lamah an ui thar thlalak hi thehdarhin, a hranpain Sandy Jean pual hian account an siamsak bawk a, follower pawh sang tam tak a nei tling nghal der tawh a ni.
